DI MARIA MANGTHA AW...

Real Madrid a ka player duh leh tan ber mai Angel di Maria chuan Manchester United a zawm dawn ta.

Amah thlah nan leh ka uizia lantir nan Real Madrid Facebook Official Page chu tiam chin awm lovin ka 'unlike' e.

Angel, nang chu i rawn let tawh lovang a, kei erawh chuan engtikah emaw page chu ka LIKE leh mai ang. Mahse i chanchin update ka hmu tawh dawn silo.

Engpawhnise duhsakna sang ber ka hlan che a. Manchester United ti ropui tu ni la, i inkhel chu ka la rawn thlir fo dawn a nia. Ka rawn tan rilru viau thin ang che.

Florentino Perez leh Carlo Ancelotti hi Angel chhuah chhan a mawhphurtu ber in ni.

Pu Perez, Cristiano Ronaldo leh Sergio Ramos pawh khan chhuah tir lo tur che khan an ngen lawm lawm che kha! I player tihkual duh dan hi zawng... a pawi teh e.

Lo hre rawh, nang aia tha zawkin a thlak tep che ania.

Ancelotti (Pa te rual mah nila Pu ti pawhin ka ko dawn rih lo che) nang pawh Real boss i nihna dinhmun tinghet a tihmingtha tu che zing a thawhhlawk ber pawl hi a tangkai zia i hriat kha.

Lo hre rawh, I la bang ve vat ang.

Engpawhnise, Angel mangtha phawt mai le

RUL LIANPUI AN THAT

Hman deuh khan Bawngva khua ah rul lianpui an that a. An rul thah hi feet 17 a sei, patling chawnpuar tiat a lian an ti a, Rulngan niin an sawi. A thla an lo la lo hlauh mai a,a uihawm hle ni. Bawngva khua hi Mamit atanga km 20 vel a hla, hmun phai tak a ni a. Khaw tereuhte, mizo aia tuikuk tam zawkna khua a ni.

Tuk dang ang bawkin ni lo chhuak chu a sa tha hle a. Mizoram khawdang zawng zawng aia em nat bik a tum em ni tih tur khawp in chu ni chuan Bawngva khua chu a chhun ngut ngut a. Tukthuan eikham a nih chuan Bawngva khawthar lam a tuikuk naupang thenkhat, anganwadi passed tawh, sikul la kal silo te chuan kawr ha lovin bawngvate lui hnar lam ah an dan pangngai angin an infiam rak teng tung a. Chutia Bawngva khaw dai mai a an infiam lai chuan an beisei hauh loh leh rin phak loh lutuk maiin an piah lawk feet 50 vel a hlaah chuan rul lianpui mai a rawn tleng ta ruau ruau mai a. A hmu hmasa naupang thenkhat chuan hmuhnawm en a en chungin “Saw, saw…” ti a an thiante kawhhmuh in an rak tengtung mai a ni.

Chu rulngan pa dum zuar mai chuan chutia authawm an hriat tak ah chuan a sahimna anih beisei in a bul a tuikhuah ah chuan a tleng lut nghal a. A thihna tur hmun a pan tih reng a hrelo. Ni e, a tan chuan mihring reng reng hi hlauhawm a ni a, tur chak tak nei mahse mihring aia chungnung tur a Pathian duan a nih loh avangin  mihring rawl a hriat chuan a tlanbo mai thin a, tul tawpkhawk ah lo chuan mihring chungah tha an thlah ngailo a ni. A taksa thang duang tak avangin a thiante aiin chaw a mamawh hnem a. A chenna hmun pilril viau mahse a bul hnai vel ah a ei awm mi ho a awm tawh loh bakah a chetvelna bul hnai a kal ngam rul dang takngial pawh an awm tawh loh avangin a tan chuan hah thi kul a eitur zawn a ngai thin a ni. A taksa len leh sei avang chuan midang tan hmuh awl hmel viau mahse a fimkhur thin em avangin, a ngamloh tur mihring ramvak takngial pawh a la tawk ngailo a ni. Hemi ni pawh hian eitur a van em avangin riltam tak chung leh mihring hmuh hlau takin nidang a a kal ngai lohna dai hnai vel a rawn hrut a ni a.

Chutia naupang rak tengtung chu tuikuk nu thenkhat in zaidam thlap, mahse vin em em siin engatinge tiin an zuk au a. Rul an hmu tih an hriat chuan pa thenkhat chu zuk tlan thla in thah an tum a. An rin aia lian an hmuh takah chuan thenawm khawveng an inau khawm ta a. Tukuk pa ho leh tlangval te, mizo leh vai te, a hria apiang mai chuan tuikhuah chu an pankhawm ta ruih ruih mai a. An hmanraw neih ang ang nen, Silai neiin silai an keng a, chem neiin chem, neilo in neihloh, an tlan thla ruih ruih mai a. Hmanraw neilo ho in mau an keng fur a. A intithu zual te’n vin takin an position tur inhrilhin chu tuikhuah, rul awmna chu hual ping ta a ni.

Chutia an hual takah chuan chu rulngan chuan tlanchhiat a tlanbo chu a tihtur awmchhun tih hriain tlan chhuahna kawng a zawng  a, a kal tumna hmun apiangah mau sei tak tak a an lo hawlh nghal zel avangin a tan tihngaihna a vang hle a. Tuikhuah laiah a lut leh a, a mangang tak zet ta, a hlauh em em mihring an tam tial tial mai bawk si a. Ni e, a tlengluh na chhan kha chu bihruk a tum vang chauh a ni sia. A tan tlanchhuahna kawng a kaw tawh silo a, mahse beidawng duh mai bik lovin a theih tak hlauh mialin tih beiseina nen mihring panna lai deuh ni a a hriat laiah kalchhuah thut tumin a bei thin a. Mahse amah thah ngei ngei tum mihring mitmeng atang chuan a tih luih tlat chuan an that dawn tih a hrechiang ropui si. A tawp nan thih leh thih tiin an bei leh a, mau zumin a taksa an rawn chhun fuh ta a, chem tle zawk a hmuh chu he khawvel a chhuahsan hma a a thil hmuh tawp ber a ni ta. Chu rulngan, ruldang te paw’n an tih em em chuan theihtawp chhuah mahse, a tlin talo a, an that ta a ni.

Chutia an sah fuh  hnu chuan tuikhuah tlangpui ah chuan chu rulngan chu a vial ngalh ngalh a. A nghawng ah tan bungin ‘haw haw’’ chungin khaw lamah an hnuchho ta a. Bawngva khaw hlui lamah man tam deuh hlek a hralh te an rel uaih uaih a, mahse a thih hma a mau a hawlhtu an tam avangin pawisa tel tur berah an buai sia. “Um..keimahnin ei mai ang u” tiin pa pakhat in a rawn rawt chu hnialtu an awmloh avangin tlai khat hmeh diat diat in a ei duh hovin an insem zo ta a ni.

RUIHHLO DO

Hmanni chu tleirawl pakhat, ruihhlo ti ve thin zeuh zeuh  hnenah hian tunlai a ruihhlo hlauhawm leh lar thar em em mai, Metamphetamine(crystal meth) hlauhawm zia leh a ngawl vei a awlzia te sawiin kan titi luam a. A hlauhawm zia te, vawikhat tihchhin a ngawl vei theih a nihzia te, a tur thawh nat zia te a uar thei ang ber a kan sawi hnu chuan a ngawi vang vang a. “kei chu tihchhin ka chak, vawi khat tihnaah a ngawl vei theih an tia, thei nge theihlo ka tichhin chak e“ a ti ta daih mai a. Chu chuan rilru chhungril ah ngaihtuah na min neih thui tir hle mai.

Mizote ze nghet ber chu kan ze nghet lo hi an lo tih thin ang khan, keini Mizo te hi thil thar tihchhin chak te, midangte’n an tih avanga ti ve chak te kan ni nawk hlawm a. Mihring nunphung hrim hrim ah hian naupang kan nihna kalsan a kan lo kan lo thanlen chhoh hian, thian kan lo ngaina chho zel a, tleirawl kan hriat tirh atangin khawvel zau zawk kan lo daichho ta a. He hunah hian  hmuh chak kan ngah a, hriat chak a lo pung a, tihchhin chak a lo tam thin. A tha lam leh a chhe lamah pawh kan lo peng chak in, kan pen kual nasa em em thin a ni.

Tleirawl sual hi a tur hrim hrim, mihring nun a paltlang ngai ve hrim hrim a ngai pawh kan awm nual a. A dikna chen pawh a awm maithei e. Kan sawi tak ang khan heng hunlai hi kan rilru leh ngaihtuahna sosan lai ber hun a nih avangin heng thil thalo tihchhin kawngah te pawh tih ve chhin hrim hrim te kan lo chak a. Ruihhlo bawih a kan lo tan thinna chhan pawh thiante avang pawh nise, kan lo ‘tihchhin’ thin vang a ni chawk. Tamtak chuan an damchhung saltanna tur kawng he hun atang hian an lo zawh tan ta thin a ni. Heng ruihhlo ngai kan tih te pawh hi heng hunlai a an lo tihchhin avang a ruihhlo bawih a tang ta te an ni tlangpui awm e. Heng hunlai a tilo chu an tilo hlen tlangpui a, upat hnu a ching thar an vang hle a ni.

Ruihhlo kan lo tih thin chhan ber ni a lang ta chu kan tleirawl lai a kan ‘tihchhin’ vang a ni chawk a A nawlpuiin a ruihhlo kan do na tur a kawng pawimawh tak pakhat lo lang ta chu naupan lai atanga inzirtir uar a ngai a ni. Naupang chu a kalna awm kawngah chuan zirtir ula a upat hnu pawhin a thlah lovang tih ang deuh khan heng naupan lai a inzirtir hian kawngro su em em a. Chuvang chuan uluk tak a kan ngaihtuah a heng tleirawl sual hunlai a kan thil tih leh kan awmdan tam zawk hi kan hmalam hun hril tu, kan hmalam huntur tamtak ziarang lo lanna hun anih avangin hetih hunlai hian kan fimkhur a tul hle a. Heng tleirawl sual hunlai ni a kan ngaih pawh a kan tihchhin duhloh a, kan  khawih duhloh chuan upat hnu phei chuan kan khawih dawn lo chiang a ni. Chuvang chuan naupangte kan nih atang a a hlauhawm zia te, vawikhat tihchhin a pawi zia te, kan in hrilhin kan inzirtir thin tur a ni.

Ruihhlo hi ram leh hnam hmelma, mi pangngai pawh mi anglo a siamtu. Taksa ti hmelhem a, rilru leh ngaihtuahna tichhe tu a ni a. Van khua leh tui chang ve theilo tur a Setana’n Thalai te ram a lakna hmanraw pui ber pakhat anih avang hian ringtu te tan chuan do ngei ngei tur a ni. Sual do a, thisen chhuak khawp hial a mahni lam hreawm pawh pawisa lova do turin Lal Isua’n min ti a. Heng kan Thalai pui tamtak Seol thim a tawlhhlut mek te chhanchhuak tur hian ringtu inti te chu awm mai mai thei kan nilova, kan do bur tur a ni.

KA BIRTHDAY (chawhchawrawi)

Nimin February 7 kha ka pianchamphaphak a ni a. Ka facebook timeline a ‘Happy Birthday’ ti a ka FB friend te’n a min wish na bak kha ka birthday behbawm dang engmah a awm lo bawk a. Ka timeline a min wish tu te, inbox lam a min lawmpuina te, ‘like’ a reply vek che u ka duh tehlul nen, tih hmaih ka neih pawn min wish tu te kha ka lawm viau a nia. Min wish tu te zawng zawng hnenah ‘Thanks’

Tin, ka lo upa leh ta sawt a. Kei leh ka kum rualpui te, ka kumkhat chhuah rualpui ho hi an kalna kawng a kei aia lar, hlawhtling te hi an kum ka hriat hma hauh pawh hian an kalna line ah hian ka engemaw tan ve phian zel lehnghal. Heng ho rapper Aubrey Drake Graham te, TV actor Josh Peck, Drake Bell te, TV actress Lea Michele, Mary Kate, Ashley Olsen, Hollywood actress Megan Fox te, Footballer David Silva te, Sprinter Usain Bolt te, Twilight star Robert Pattinson te, Zaithiam Kellin Quinn te, Zai leh lemchan lam ti mi Lindsay Lohan te, Lady Gaga etc.. te nen hian kumkhat chhuak kan ni ve miau a. Ka pian kum hi he khawvel kum chhiar ah hian awmlo ta se, heng keimah & co. ho hi kan awmlo maithei asin! J Ka kumkhat chhuah pui ho  hian fans pawh an ngah phian maithei asin.

Ka ti lehpek thin ang. Kan birthday te hi kan lawm viau rual hian duh lo sa teh mah ila, kan upa sawt tihna a ni a. Kan thihni kan hnaih deuh deuh tihna a ni thin. Kum 2014 kum pawh hmang ve si, mahni birthday hmang thleng zolo mi engzat tak awm ang maw? Chuvang chuan keimahni duhthu a kan thlen theih pawh a nilo a, Pathian malsawmna avang liau liau a heng hun te hi thleng thei ka ni tih ka inhriat rual hian PATHIAN hnenah pawh lawmthu ka sawi a ni.

He hun thleng thei a Pathianin min hruaina ah hian, hrisel takin, vawikhat mah damlo lovin (ka pian atangin, hriatlang, khawsik satliah chauh ka la nei) Ka sikul kal hunchhung leh Naupang Pathianni Sikul ka kal chhung zawng pawh a kalkim thei a min siamtu Pathian hian sum leh pai in a lei theihloh heng hriselna kawng a hausakna hian min va vur nasa em! Lalpa ka lawm e.

Mi te ang in sum leh pai neilo mah ila, Kohhran leh khawtlangah te kan thathnem loh tehlul nen hian ei duhloh zawng te hi kan neilo rauh a. Thildangah rual pawl phalo hle mah ila, ei leh in lamah hi chuan rual te hi ka pawl phian a. Mi te angin ka  rilru te hi chak lo mahse, ka pumpui te hi a chak nek a. Ka pum hian ngeih loh leh digest theihloh, pai tawih teihloh hi a nei vak lo ni hmiang ka ti mai a. Ka weight pui te aia dul kiar khawp a ei ka theih tak hnu hian Pathian malsawmna ah ngaiin chaw eikham a tui in teuh thin chungin ka kum rualpui te zingah chuan Kuhva ka heh ta ber mai lo maw? J

Declan O'Callaghan nen Darkar 2 leh Minute 13

2.05.12 zing dar 10 vel chuan office lamah ka'n buai ve deuh a. Eng eng emaw ka tih hnu chuan pawn lamah kan kal chhuak rih a. Chhun lai takah chuan office ka lut leh hlawl mai a. Beisei phak hauh lovin Declan O'Callaghan chu a lo thu zawi kawisawi satliah ngawt a. Ka phu zawk hranlo, a hmel ka hmuh avanga han phul hlutna tur engmah a awm chuanglo ang bawkin han hmuh loh der ngawt aiah 'engtik nge i chhoh dawn?' kan tih ve tak ngawt kha...

A facebook a/c a check duh thu a sawi a, tlangval ta chu notification/ message/ friend request a awm thut ang chu tih nak alaiin notification pakhat chiah zuk awm pek a...chu pawh chu...(hemi hma zan a a luh bak la lut miahlo ania) engmah vak entur awmlo ta chu 'enteh..Engaged to ......haha' a tia.. Tlangval bialnu introduction pek dan diktak hmangin 'a hmel chu chutiangin a .... hranlo, mahse a fel ve a...' kan beng lehlam ah a lut a, lehlamah a chhuak leh mai.

Ka hmuh tum ber ka la hmulo, ka hmu dawn talo amaw ka tih hnuah a kekawr a zen ruk ruk a, Raja Chap Khaini ngei mai a rawn phawrh chhuak a, a kut veilamin a heh a pawt fan a, a kut dinglamin a sawh hmek mai a ni. Ropui tak a ni..ka lawm e...

(July 6, 2012 at 6:04pm)

INKHEL EN THUNAWI (Mamit July 25, 2012)

An chhungte in awm pawh in min lo hrethiam dawn nia....

Phaizau hi engtikah nge an khelh dawn ka hre chiahlo.. 1st leh 2nd match kha chuan an khello chiang a. Mahse Hreuva hi ka office thlen tirh (dar 9:25AM) atang khan full uniform nen a lo inthuam ap tawh mai a. kan lian tual tual, ka hmu te (body size) ta riau mai.

Hman atang tawh khan Phaizau inkhelh apiang hian key player/playmaker ni chho ve ngar ngar thin kha a nia. An lo upa ve ta deuh nge, nikum kha chuan substitute a awm loh pawn, defence line lamah a khel ta ziah mai.

English Club a khel chu nise, Giggs te nen a vanglai hmang rual, Scholes te nen a larchhuak rual an ni awm sia. Manchester united ah pawh khel se, veteran player, Sir AF a meuh pawhin a players hlut em em a ni tawh ngei ang.

An khel leh ang a, kotlang lam a nula te'n..."Hreuvaaaaaaaa..." an lo ti leh tuar tuar ang a. ball chang mang lovin Center Fresh a thial hang dup ang a. Inkhelh banah berh em em in kan office hnuaiah, Chow (with Free Soup) nen a rawn inhnawhpuar leh awm sia... ....

UPS a quit dawn...duhtawk mai ang...laklawh ve....

Ka FB friend Tla Vaiphei nen 23 mins (a hun/ziah hun nen 30.08.2012)

Tlai lam riltam hun a ni tawh a, naupang zual deuh te phei chu chaw ngenin an phi ruai tawh a. Office hnathawk an bang tan a. School bus paw'n horn an rawn tiri ruai² a. Kut hnathawk mi tamtak la chawl lo mahse khawlai a lun lai tak a ni a, kan traffic te paw'n an hna an thawh mek hun a ni. Keini pafa erawh a hla lam panin kawm zawngin kan inphur chhuak ve mek bawk.

Kan tlan zel a, Ka Nu Zaii te inah kan lut a. Naupang leh naupang inhmu chu an phul hlut a. Keini 'patling' erawh chuan a kil sir lamah nikum October chhuak chanchinbu Vanglaini, a vanglaini pel tawh hlam duai² pahin kuhva hring kan thial sawk² mai a ni.

Top-up nei tih takah Airtel sim card hmang ho chuan a khat tawkin 'pack, topup' tiin an rawn arnghal luh thelh sup hlawm a. Pisa kai mi te, lung la te, misual man tu te, zu in mite, chawhmeh zuar te, zirlai te an ni fur a. A tu a mah uksak lemlo chuan ka kuhva thial ka lem hun tur chauh ngaihtuahin phone chuang an dah ka lo khal niap niap a. Chutah tak chuan top-up thun pakhat chuan, "Kha, Hlute inleng alaw..." tiin min rawn bia a. Boruak a intan ta.

Declan nen an inbiak that vang nge, keini aia kawng tinreng a rual u zawk, kum ah, thiamna ah, zirna ah, mizo tawngah, thuziah ah..etc. (leh sual ah pawh..haha). Kan zah deuh tlat a (e ka hria, min zirtirtu a ni). "Aw, nia...hehe.." tiin ka kutchi lo hawi ta mai² a ni.

Topup'ers dang ho angin a chhuak ve ta mai silo. Ka biak loh chuan 'sa nisi' ka biak chuan 'hmm.. nisi'. Mahse, kei facebook'er!!? hian titipui ve ngei ka duh sia. Fb kaihhnawih lo sawi dawn ta ila enge ka sawi ang? Declan a chungchang sawi ta ila...nilo an in msg ziah ang chu. Kei aiin declan a kumkar a hre zawk daih ang. Kuhva tuizia...nilo, kuhva tuizia lamah chuan a tui ve tawp nang. Zack a chungchang...hei pawh ni chuanglo..'Suarhliap a mi kha maw..' a ti ang a, a tawk der a ni mai. Septic Tank chungchang...trullo, enge maw septic tank ka ngaihtuah ringawt le... UC browser sawipui ta ila..nilo, 8.4 a hman thu a rawn post kha..

"Password theihnghilh hi engtin ni ang?" tiin vau titih, zilh titih, thlem titih, hau titih in min zawt ta khauh mai a. Ka hriat ang ang chu tlawn titih, hlau titih, zak titih, hrilh titih in keiin ka lo chhang a. Ka nel ta deuh, kuhva hring hmuam duhdah pahin a thutna ah ka phei a. A bul a ka mawng thianghlim hun pah chuan a lamah 4inch velin ka'n nuthlawi zaktheilo tawr hurh a. 'A tirin eng lo awm rawh se a ti a' tih atanga Johana Thupuanchhuah thleng in ka hriat zawng² leh phuahchawp te nen a password reset tumin, tlai tla eng mawiah, lungleng mite tan a hun duhawmah patling 2 kan inbekbawr tan ta.

Signal a awm theilo, a phone chu pawnah a va hnehna puan banphar pui lawp² a. Engtin tin² emaw a kan tih hnuah..a email ah reset code kan thawn luh tir ta zan mai le. A rocketmail kahchhuah in a thlawh luhpui reset code kher chhuak tur chuan a email kawngka ah kan ding ta vang mai le.. Mahse a chabi reng² a lo ak lo niin.. Kan buaina zawng² chu a lothlawn in chu tlaitla engmawi tak hnuaiah chuan lungleng hauh lovin kan thamral tir ta a ni.

Zial tan kai nan a lighter a talh a, bike ka self nung a.. Tlaikhat na reng² atan kan inthen ta..

KA ZIN (Mamit - Kanhmun: lehlang)

Zinni 12.09.2012. Ziahni 13.09.2012

ka duh lai lai ka la ang a, engkim inpawlhin, ka rilru a awm hmasa sa kan thailang thuak thuak ang e.

(kalkawng a ka ngaihtuah te, khawthlang hi khawchhak lam ai chuan kan hnufual tlangpui, sai ka hmu vel, ka ke a kham, ka bike brake a chik amawn le, rin aiin motor tawh tur a tlem, ruah a sur mai ang a..etc)

Pu te hnungzui a lehlang a khawthlang bial fan ngai miau hek le.

Voucher, passbook etc. ka ah duh avangin ka ipte chuam, inkhawm na chauh a ka ah thin. Ka lei tirh atanga a chhung a Bible, Hla Bu ka dah char² thinna chu bunruakin ka ak ve ran mai a. Kanhmun kan thleng dawn tih hriain a chah mi te'n pakhat lek ti a, pawisa min bel luih tak ah chuan 'ka ngam chuan le' tiin, huphurh ru tak chungin kan inzui chhuak ta a.

Kawrthah thleng bak la thleng hek lovi, a piah lam kha chu ka dai chin² ka kal chin, ka hmuh chen² ka en chin, a vawikhatna a ni vek mai.

Tihtur leh tih loh tur ka nei ran mai sia. Tuidam daiah 'ISUA NISE A TI ANG EM?' tih intar ka hmuh chuan 'thurawn' min pe mahse, ka ngaizam lui a. Tuidam kan tlan pelh dawn chuan 'A HUN KA RUATAH CHUAN DIK TAKIN RO KA REL ANG' tiin min vau tlat tawh. Tuidam atanga Rengdil thleng chu 'tauh si ri bup' leh 'mawng sawh dawm' te nen a tlan phei a ngai a, kan insawh thleng ve mai.

Rengdil, Bungthuam etc. a kan tihtur ang ang te kan tih zawh tawh hnuah kan tihloh tur ti turin Kanhmun lam kan pan leh ta.

Damcherra kan lut phei a, thenkhat sawi dan chuan 'vairamah vai an sual' an ti thin sia. Vai an lo tam sia, min sawisa mai anga kan ti rilru deuh a. Min sawisa ta mai silo a, vai pawh fel an awm ve tho aniang ka ti ta mai.

Ka va lam ve ta, ka Bible ahna ipte a Bible dahchhuak a, MLTP act um 1 kan dah ve ran mai chu(h). A rit ka ti khawp mai.

Haw lamah Zarzokima, tuikuk helin an thahna hmunah kan chawl a, tamtak chuan vawi tam in paltlang tawh ang. Kei atan erawh a vawikhatna ania, a hlu ka ti hle mai. Kum 3 hnu a Zarzokima thahna hmun ka hmuh chuan ka rilru a ti thar hle a. Khua a ti harin, hnam hmangaihna in ka rilru a luah thar a, ka insehruh teuh mai.

Tuidam bawk: kan tluang viau, Tuidam dai a ak lo tur a min ngen ni a ka hriatna, bawhchhe chung si a ka tlan pelh dawn chuan, hmangaihna tawp lova min hmangaihtu chuan 'KAL LA TISUAL LEH TAWH SUH' tiin a zahngaihna a la lantir fo ania.

Engpawh nise, ka kal thui bawk a, fa te hmingah Ramfangzauva/Ramfangzauvi phuah pawh ni ila tu'n min dem lawng chu...!

Thu Vavuk

# HMELTHA leh HMELCHHIA fiam inthlauhna

Hmeltha leh Hmeltha lo zawk kan awm ta a ni. Lo hmeltha ta ila, pakhat hmelchhe thung se. Mi in min lo sawi a, kei chu 'i hmeltha' min ti ta se ka nihna avangin ka huatna chhan tur a awmlo ang a, 'i hmelchhia' min ti ta se min fiam niin ka hria ang a, ka tan huat tur a awm lovang. Chutih laiin pakhat zawk hi miin min tih ang chiahin ti ve ta se, 'i hmelchhia' an tih chuan a nihna an sawi a ni ang a, a haw viau ang, 'i hmeltha' an tih phei chuan min hmusit a ti daih mai ang.

Han ngaihtuah teh, a thu kaldan te khi mak ve riau...hahahahaha

# Thu inang, awmze hrang

Inngaizawng an awm a, a mipa paw'n a duh hleuh hleuh viau a, amaherawh chu engemaw vangin a hmeichhia a chesual a, ngaihzawng dang a neihsan ta hlauh mai a. A ngaihzawng dang ah chuan rilru tak tak pe thei chuang si lovin a awm a, a inchhir a, a inlamlet leh ta a. Amah hmangaihtu bulah chuan

"Min ngaidam hram rawh, ka tisual leh tawh lovang" a ti a. A mipa chuan an ngaihtuah vang vang a,

"Kei pawh min ngaidam hram rawh, ka tisual leh tawh bik lovang" a ti ve ta a ni..

Khi thu inang awmzia dang daih a a chhuah dan khi han ngaihtuah neuh neuh teh...