RIP Bubu

Kan ina Sazu a awm avangin zawhte kan zawng a. Remchang takin chhungte'n kumin march ni 12 khan Zawhte no pahnih min pe hlauh mai a. Kan fate pahnih in in sem nghalin, A u zawkin a buang (a upa zawk) a hauh nghal a, a hmingah Jojo a phuah a. A nau mipa naupang in a dum leh vara tial zawk chu chuam ve in Zorobot a ngaihsan em avangin a hmingah Bubu a phuah ve nghal a. An intihtheihpui em em mai a. Hmelhriat apiang an lawm ve turah ngaiin an hrilh chawt zel a, kan hlimpui phian a ni.

Ina awmpui reng aiah tiin, April thla tir khan an zawhte chuam ve ve pawmin chhungte kan tlawh kual pui a. Ka nu nau te inah chuan an naupang ho hnenah an zawhte te chu an han pawmtir ve vel a, Bubu-a zawk chu kan lennate khum hnuaiah a biru ta tlat mai a. Man kan tum viau pawhin kan man fuh hleithei lova. A remchang em mai tiin, kan hnutchhiah a. An lo vulh ve duh tho avangin kan pe ta nghal a ni.

Chuta chin chu Bubu-a tellovin kan khawsa ve ta a. Inti neitupa takin Dino-a'n a hriatchhuah chang changin a lam thin a. Mahse kan ngaihsak zui vak lem lo. Tlawh ve hrim hrim tha a kan hriat avangin April ni 14 chuan a eitur te kengin a U Jojo-a hovin tlawh turin kan kal a. Mahse Bubu-a chu a lo biru tluan thak a, a hmel hmu lovin kan haw leh ta ringawt mai a ni.

April ni 16 a lo herchhuak a, Bubu-a neitute hnen atangin a damloh thu kan hre ta a. Tlawh ve ngei a, a hmel te pawh hmuh ve ngei tha kan tih avangin chhungkaw kimin Jojo te nen, zawhte chaw te, bawnghnute te kengin kan va kal a. Mahse kan thlen meuh chuan zawhte kan inchan ta lo. A lo thi hman a, an lo phum zo chiah a lo ni a. Zawhte mah nise kan ngui nghiai mai.

A pi thar zawkin a chanchin minlo hrilh siam siam a. Zana amah menpuitu a nih thin thu te, sunday zana a hram dan dikloh dan te, a dam lo an menpui thu te. Vety lama an entir a, an lo chiu thu te. A damdawi an lo leisak te pawh kan han hmu a. Duat taka lo enkawl in thlamuang takin a thi a ni tih te kan han hria a, rilru a khawih reuh hle mai.

Jojo leh Bubu awmdun lai chuan Jojo hi chu Kimkimi chuam a ni bawk a. A duat a, khumah nen a lo awmpui leh thin a, chu chuan a ti pangchangin, thutthleng, dawhkan, khum vela han lawnkai mai pawh a hrat in hauh reng a ngai a. Bubu thung erawh chu Dino-a'n a duat thiam vak lo nen zawhte inthlahrung tak mai a ni a. An infiam loh chuan chhuatah a awm melh melh thin a. Hetia beisei loh tak maia an thih thut takah chuan nakin hnu a hriatreng atan a pualin he thu hi kan ziah sak ve a ni..

RIP BUBU

KA MUMANG

25.06.2018 zan/zing chu mumang ka nei pek a..

Ka mumangah chuan ka thianpa Pu Lalthanpuia Birthday kan lawm dawn a. Kohhran hall ah hian Kohhran Thalai ho kan lokal khawm mup mup mai a. Kei ber kher kha mumang neitu ber ka nih vang nge birthday lawmna kaihruaitu ah min lo hmang pek a. Kal kan tam a, lawm pui pawh kan lo tum khawp mai.

Ka inbuatsaihna pawh a tha thawkhat a, thil han sawi karlaka fiamthu han zeh zeuh tur nen lam ka inring ran ran tawh a. Programme kan tan a, Cake zai kha a birthday nei tu lam te'n tih hmasak ah an duh avangin zai mai turin kan inbuatsaih a.

Birthday neitupa in zai tawh mai tur a min tur bakah an ei chak tawh bawk si a. Mahse zai ta mai lo chuan sawm te ho la thleng lo an la awm nual avangin reilote han nghak leh hlek teh ang ka ti pek a... ka zunchhuak in min tiharh ta daih mai.

Ka va zung a, ka mut leh pah chuan ka mumang ka hrechhuak a, man chhunzawm leh mai inring chungin ka muhil a. Mahse ka man chhunzawm ta lo.

Ka harh hnu chuan ka ngaihtuah ta a, cake zai tura min tur laia zai ka lo ti ta mai lo kha ka inthlahrung leh hnuhnawh khawp mai a. Khati zat lai mai lo kalkhawm tawh hnu a, a kaihruaitu ber ka harh ta daih mai kha mumang mai mai mah nise, a nuamlo ka ti leh ta khawp mai.

Khang mipui lo kalkhawm te kha engtin nge an awmzui tak ang aw! An hawihai lutuk dawn hian ka hria a, a nuamlo ka ti khawp mai. Birthday neitupa khan min haw viau ang a! Naupang cake eichak te khan an ei ta ang em? Nge ni a... midang in kha Birthday lawmna programme kha an kaihruai chhunzawm ta ang a, an lawm tho ang. Nge ka harh tak avang khan ka birthday lawmna kha a zuzi ta ni ang le?

WORLD CUP THLIRNA TAWI

World Cup hian rau eng engemaw hi a nei ve a. Side effect pawh a tha lam leh thalo lam pawh a nei ve a ni. Mite chik lemloh nghawng thalo tak a neih chu....

World Cup hian pumpui a ti chak lo. Hei hi tamtak ah chuan a thleng dik tlat. Zan danga mu hma thin tamtak te han menrei takah chuan mei zu mi chuan a zuk sek loh nakah, meizial te hi thildang atan tangkai hlawl hek lo. Tuibur hmuam mi chuan a daih zan tur lei lawkin, referee whistle rik apiangin kan hmuam da hman ziah. Hmuam mai loh chuan thildang atan hman theih hek loh. Kuhva, Sahdah (rum nuai al- rubber sen tawn, a laihawl- rubber hring, a al lo,-rubber eng tawn) Shikhar chenin World Cup hi nuam an lo ti ve viau a. Zuk leh hmuam tih nasat chuan pum in a tuar tlat a ni.

Pahnihna ah chuan vawk a lungawi lo.
Vawk vulh lo pawhin a vulh te ta tur chaw thing tha deuh deuh kan lo khawl ve thin a. World Cup en a, zan menrei chuan ril a lo tam a. Tamtakin eitur tuihnai tak tak ei thin mahse MIPA diktak chuan Chaw thing leh Wai wai chhum a eipawlh thin miau avangin vawk chaw tur chaw nawi a tlem a, vawkin a aia tui lo zawk hnimhnah lam a ei tam phah ve tlat si a ni.

Tin, heti hi a ni a:
England leh Belgium chu Group Champion nih loh an duh hmel viau a, group stage last match a an player luhtir dan atangin. Mahse an zinkawng zawh tawp hun a inang leh si a. Chak loh pawi ti lo inkhel kha, chak ngei ngei duhin 3na zawngin an inkhelh leh a ngai dawn a. World Cup 2018 ah vawi 2 an intum dawn bik bik lehnghal a. England pawh puanthuah tel hma viau tura beisei kha inrinni zanah 3na an zawn a ngai dawn a, a tuk Sunday, Sumo tlan loh ni a ni sia. Champion te nen an haw rual thei dawn a ni. Pathumna ni zawk zawk chu an lawm ve leh viau dawn a. Mahse an han khel zo mah ang a, lawm viau si, nui deuh hui chungin lawm lutuk lo angin an awm vel ngei ang a...3na inchuh a ni dawn si a. Final lama pahnihna erawh thung chu an tap leh chiam ang a, a then an mu ang a, a then an thu kun lap ang a. An Coaching staff leh substitute inla fel deuh te'n an han hnem leh vel ang a. Mi tihdan takah pahnihna aiin pathumna an lawm leh zawk dawn a lo ni.

Inkhawm lova ka en apiangin ka tan an chak tha duhlo va, keimah vangin Germany an tlak phah tawh a. Ka inthiam lo viau a, anmahni lam hian an hriat te pawh ka hlau deuh rum rum a ni. Keimah vang bawkin Spain an han tla leh zel phei kha chu a nuam lo ka ti takzet a. Football pundit leh computerji lam chhutna meuh pawh in Champion tura a beisei nisi, heta Mizoram daikil kara keimah vanga an lo tla ngawt hi a nuam ka ti lova, a hreawm ka ti viau.

Final ah chuan Pathian zarah ka inkhawm theih ngei ka beisei a, ka tan an chak ngei dawn bawk a ni tih chu Chengkawl hi a thlawk ve theilo tih tlukin ka chiang ta a ni. Nileng a "Kan Pa vana mi.." vawi 4 vel kan sawi zawh hnua en tur ka ni bawk a. Ka tan zawk an chak dawn chiang a ni. A chhan chu ka tan ve ve a.

Ka thiltawn 1 - ZINKAWNG

A ni leh thla leh kum leh darzat leh minute leh second ka hre ta mai lo. Ka bike thar Apache RTR 180 in Mamit atangin Aizawl lam ka pan ni kha.

Tlaiah Office ban veleh (chu chu Behliang mun hun pelh tawh lam a ni) hmangaih ber te lenna lam panin ka kal a. A hnawksak lo thei ang berin T Shirt zangkhai deuh leh Short pants ha in, Sneaker ka bun a, backpack zangkhai deuh ah kekawrte leh hakthlak tlem nen ka kal nghal a.

Tawngtaina hmun ka thleng a, tawngtailo a kaltlang nuam ka tih loh avangin mi in min hmuh leh hmuh loh hawi zauh zauh chungin, rilru in ka tawngtai a. Kuhva phawrhin panhnah pahnih ah chinai tat in kuhva rah pathum ka hmawm tel nghal a. A chhan chu tlan paha a dang siam a rem thin loh avangin.

Khaw en laia Lengpui tal thlen hman tumin chak pangngai deuhin ka tlan a. Mahni chauha zin nanana, titi theih hek lo le, tih tur awm chhun rilru kan kawm ngawt ngawt mai a. Thil chi hrang hrang ka ngaihtuah a. Thlahrang ka ngaihtuah chhuah apiangin ka rilru atanga ka dah bo theih nan Kohhran hriata phawrh chi loh thil ka ngaihtuah vat zel a. Tluang takin tlai thim thet thet ah Lengpui Zero point ka thleng a.

Han tlan tlang ve mai awm ka nia, engin nge min mawlh ni. Kan ding det a, kan zi mar khanglang a. Ka tlan leh tur chu Restaurant pakhat kawt atangin ka Pa rual zet tur, Apple hmin tawih rim nam rum rum hian chuan ve mi rawn dil mauh pek a. Chhuanlam tur dang ka nei silo, a hnung a ruak si, hreh zet chung 'AW' pawh ti duh lovin 'Umm' ka ti ta anih kha.

Ka pa thar, oh! thianpa thar lah chuan a hnunga bag ah ngawt nilo, holdall tel lian tak dawr chhunga a dah a va pu chhuak tehreng anih kha. Awi awi awi... ka va huphurh tehlul em! A bawr thei ang berin kan han chung dun ta poh anih kha. Mahni a titi pui tur neilo khawhar fahran kha titi pui tur ka nei ta che'ng a. Lungawi lo zet in, 'um um' ti a chhang chung zelin a tlangval lai chanchin te kha min hrilh phet a tum ta a nih kha.

Sairang kan thlen chuan a thim tawh a. Kan bawr si, a zu rim thing nen, rimchhe bawk si, "Ka Pu, Motor dang lo chang mai ta che, ka hmanhmawh bawk si a......" tiin chhuanlam tha tak nen mi motor oil zawrhna dawr kawtah ka chhuktir ta ngawt a. Ani lah chuan, a bag lianpui leh holdall nen a inpu bawr teuh chungin, "Motor dang ka hmu tawh awm silo a, min phur ta sa sa a, min phur thleng law law la" a ti bawk si a.

Kan in dawr fe hnu chuan ka ngaihtuah vang vang a, sawi dik ka ti bawk si. Ka phur ve tawh lem a, laklawh deuha chhuktir kha dik chiahin ka hre bawk silo. Lengpui atang khan lo phur ta lo law law ila tih te ka ngaihtuah a, Lengpui lama han dahthlak leh ngawt chi ni bawk silo. A bul atang bawk chuan kan inrem tha leh ta a.

Ka lung a awi chiah lo nen, "I chuang ngam chiah ang maw? Ka speed a sang ania, ka tlan chak dawn ania" ti a vau khar khar chungin kan chhuak dun leh ta a. A clutch thlah deuh dawt dawt pah chuan kan phih deuh dawt dawt a, kan tlan chak chho deuh a, "Ngawi teh, ngawi teh..." a rawn ti chul a. E he le, chhuk mai a duh dawn aniang a, ka ti hman a.

"Ka bag hi a lian sia, kan ak tha ang e" a ti a. A bag a ak tha a, ka hnunga rawn thut leh pah chuan ka taksa thlawp zaihin a thu a, ka dar dinglamah a hmai a rawn dah a, a kut pahnihin ka pum zawnah a suih chat mai a. "I duhtawk a chakin tlan tawh rawh le" a rawn ti heih mai!

Thui vaklo chu ka la tlan chak, kawngkawiah te khan cornering that nan a ti nge thahnem a lo ngai bawk si a. Min kuah run chuan ka awm a ti nuam lova. Ka hmai bul set a a rawn dak ve chuan min ti thlamuang lova. "Ka pu, min kuah lo mai rawh, kan tlan muang mai dawn nia" tiin tui lo zetin muangchangin kan tlan chho dun leh ta anih kha.

RV kan thleng chho a, chuan man tur ka pe silo che a, tiin a chuan man tur atan local lak a tum ta a. "Ka in ngai lo, chuan man a ngai lo" ka tih chuan "Ka hah em a, ka ta tur chauh kan lam tal ange" a ti talh khanglang a. A chhuk lai tak chuan ka tlansan ta daih anih kha.

Mahse, ka tlan thui hma in, kha leh chen kan lo inphur tawh a. Khalaia hnutchhiah leh daih kha a sual thlak ka ti si a, lungawi lo zet in ka tlan let leh a, a rawn chhuak chiah nen kan inhmu leh chiah. " Ka rei em?" tih pahin a rawn thu leh ta a... Lungawi chiah lo ve vein Aizawl chu kan thian dun chuan kan thleng ta poh ni ber in ka hria.