LAK TLAK LOH

Kan naupan laia kan Serthlum huan a, mi ruk tur venga nu leh pa te'n ka U nen min kaltir thin lai kha, a lo va rei ta in kan lova laktlak loh thin tak.

Serthlum huana kal khan kan ei hnem thin lutuk kha chawhma chhung chauh pawhin kan va 'e' hnem hman thin tak!

Khawi kung bulah pawh awm ila, kan ek a chhuah khan mahni chauh pawh ni ila, kung dang bul kan han pan kher zel a, kan hung ngat zel. Kan ek chhuahna kung bulah khan lo ek ve mai thin awm. Huan chhunga e tho kan ni sia.

Nikhat chu thlamah thlamuang taka mi ruk tur venga kan awm laiin, kan ven chhan bawhchhe ngeiin, Phaizau lam mi pakhat in a lo ru khanglang a.

Hauh chu khawilam.. ka U nen a ru tu khan min hmuh hlau in, thawm pawh nei ngam lovin thlamah ngawi rengin a ruk chhung kan biru tehreng a...

Kan awm tih hria a, ruk loh phah chu an awm ngei ang. Mahse ru an awm chuan kan biru ta ziah anih kha...

Kan va laktlak loh tak!

A LONG LONG LOVE STORY

Kum 10 chuang zet liam ta khan Aizawl veng pakhata hmeichhe naupang ka hmuh pakhat kha chhiat loh hmel e ka tia.

Mahse inhmelhriat ngawt theih a ni silo.

Inbiakpawh dan tur ka duang rilru ta a..

Damdawi zuar an ni bawk nen, damdawi lei ngawt dawn ila, a hritlan pawh ka hritlang silo. Ka u thin na țhin khan Zinetac a ei thin tih ka hrechhuak a, a dawr nghah lai ka chang ta ran mai a ni.

Tichuan le.. tumkhat chu an dawr lam ka kal remchang nen, an dawr kawngka ah ka dak lut a. Ka aw mawi tak mai khan "Zinetac in nei em" ka ti ta anih kha.

Amah ngei mai khan min lo dawngsawng a. "Nei e, engzat man nge?" a rawn ti a. Rs 5 man ka duh thu ka hrilh a, a chep thla a, mahse pawisa ka lo ak lo zui a. Ka lei leh ta lo anih kha..

Mahse kha khan pawisa keng ngeia Zinetac lei ngei a chawh ta tlat mai. Zinetac kan lei leh zet zawng kan boruak hap a dik chho ta a..a dik chho zel a.

Kum 10 zet kan lo innei ve ta reng mai.

Heng te hi thleng ta se, kan intawng kher ang em?
Zinetac zuar lo ta se..
Zuar tho siin, pawisa kha lo ak ta si ila..
Ka u thin kha na ngai lo ta se..
Zinetac damdawi hi a siamtute hian siam chhuak lo hrim hrim ta se..

CH SINGH / CHOOSING / CHAWSING

Engpawhnise ballboot chu a ni.

A hmalamah hling pali, a hnung lamah hling pahnih a nei a. Hei ai hian hling nei tam se tiin ngaihtuahna ka lo seng ve tawh thin. Thlasik laiin a sawng te țhin a, tuiah zankhua in an chiah a, a lo puam/lian leh țhin.

Kan nei pha ve ngai lova. Mahse mi duhloh hnu, mi paih hnu kha bawlhhlawh paihna ah, a khingkhat chauh, puitling bun tawk lian zet mai kan chhar hlauh mai. Nghahmawia nen kan ni a, kan intihțawm nghal.

A hling pakhatmah awm tawh lo sa a ni a. Kan ballboot khing khat chhar ti changtlung tur chuan Mamit khua ah ballboot hling tla hlang 6 tal zawn hmuh a ngai ta.

Hun khawhral tam lovin kan hman hun apiangin kan zawng a. Mak ve deuh chu, a zawn a zawng ta nafam chuan chu ballboot khingkhat daih bakah a spare tur nen, a hling kan hmu nual mai.

Mistiri zawk Nghahmawia'n perek in a hling 6 zet a kilh lut a. Ballboot khing khat, hlui lian zet, a hling kim biai a kan nei kha chu naupang dang khan min awt ve chiang alawm.

Luangpawl Vengah Thanzawna team leh RDC (Rindika Club) te an inkhel dawn a. Min dil angin Thanzawna kan bun tir a. Ballboot bun awmchhun niin, khingkhat chauh bun in a khel a, a hling zawng zawng a ti thlawn leh vek.

A hling thlawn vekin min pe leh a. Chu ballboot chu hman tangkai dan dang kan zawng leh a. Sairawkherh phan ah kan chep ral ta daih.

INTIHHMUH STAR

1998 vel bawr kha a ni maithei. Irish pop Group Westlife kha Mizo tleirawl ah an tla na khawp mai a. Tunlaia EXO, BTS tih ai mah hian an hunlai khan Mizo ah star tu an ngah mah awm e.

Westlife member ah rau rau pawh Mark (Markus Feehily) kha nula zingah a tla na lehzual a. Țumkhat kan u tleirawl pakhat sikul bang khan Mark a star zia sawi pahin Chanchinbu kawm a Westlife thlalak a rawn keng va va mai a.

Ka U mipa nen khan kan lo enpui a, "Mark hi a te bik si, a hmelchhe e.." kan lo tia. Kan U-i lah chuan a hmelțhat zia hi in hmu thiam ve lo anih hi! Kan sikul ah pawh hmeichhe hovin an star vek a tia. Mark-a thlalak bik te kha a chep thla a, a khum bulah te a tar a.

TV a Westlife zai apiang khan Mark-a hmelțhat bik zia te a sawi țhin. Thla 4 hnu velah V Channel ah an kawmna nge ni kan en fuh hlauh mai a. Kan U-i'n hmelțha bik a tih em em, a pate ber mai, Mark-a a tih kha a hming an rawn ziak a. Kian-a zawk a lo ni daih mai a.

Khata țang khan a star a thlak ta a, Mark-a tak tak a star fuh ve thei ta a ni. V Channel chu fakin awm rawh se..

A LO VA MAWL THEIH TAK!

Kum 10 chuang liam ta khan, ka nau nen zirna avangin in kan luah dun a.

ZUN : Zana zun chhuah a, pawna zun kher ngai kha a ninawm ka ti a. Zun bur inchhawp mai țhain ka hre ta a. Pi Kimi dawr te ah Centre Fresh bur ruak ka dil a. Ka chhawp ve ta ran mai a.

Zun bur han inchhawp takah chuan, a bur a lian si a. A khat zolo thei em em mai a. A zan 3 na ah chuan mut dawnah tui a tam thei ang ber ka in țeuh a, tichuan vanneihthlak tak maiin muthilh hmain centre fresh bur 1 kan zung tehreng mai a. Ka lawm lutuk in ka nau ka va kai tho a, kan hrilh ve ngial nain ho a lo ti hle a. Mahse ho a ti chhunzawm vak lo nge a zan leh ațang chuan Pauls (squash) bur ruak tan bun a inchhawp ve ta ran mai a ni.

EK VAN KAWK : Țum khat ka inthiar chu vanneihthlak tak maiin ka ek kha commode ah feet 1 vel dawn laia sei hian van lam hawiin a ding ngil auh mai a. Witness ka mamawh avangin tihchhiat hlauin commode lo laiah ka mawng ka sil te te a, ka nau ka va ko a. 'A ho em mai a' ti chung si khan en turin a rawn kal ve tho a. Kan en dun a, thla kan la a. Tichuan ka inthiar chhunzawm leh ta a a.

EK IN HNAI : Kan toilet hman țhin hi pawnlamah feet 20 vel lai kea kal ngai țhin a ni a. Zan khat chu, zanlaiah tak mai ek chhuak in min țhawng harh a. Khami zan khan ka zahzum a chhuak tlat pek a, mahni a va inthiar kha ka zak in ka inthlahrung em em mai si a. Tihdan tur ka ngaihtuah ta a.

Polythene ruak ka zawng a, ka ham chhin zel a, a phui ber awm chhun chu thlangin, kan thleng silna ah ka lawn a. Zanlaah tlangval a pumpa polythene keu kau chungin ek ka tum ta a. San pek a rem țeuh loh avangin idea dang ka nei leh a. Kan bel neih zinga pian nalh ber pawl, kan sa bel ve țhin chu thlangin, polythene chu bel thlawp zaihin kan dah rem te te a. Ka bun ta hawk hawk mai a ni.

Ka zawh fel chuan uluk deuhin ka bawk a. Ka mutsan ta a. A tuk zingah chuan ka nau tho hmasa chuan enge a nih hre silo in a lo nem chhin vel a. A nem ve nuak sia, sa a maw a lo tia. Ka la sawi duh lova. Ka la paih phal lova. Midang nghah ka la nei a ni.

Kan nau pakhat lo leng chu a pawn ațang chuan ka khawihtir chhin a, enge a nih i rin? ka han ti a. Sa anih a ring leh tho mawle. Mahse kan hmeh ta lo

DRAUGHT BOARD TE CHU THIAM E !

Kum 2017 a ni a. Mamit khawpui chhunga Department hrang hrang te chu Group ah siam in Sport nei turin ruahmanna siam a ni a.

Keini Orange group pawh Champion ngei tumin sport item hrang hranga a ti mi deuh te thawhkhawm a ni a. Kei pawh ka thiamna tak, keima insawiluh ngeiin Draught Board ah tel tura ziah luh ka ni ve ta ran mai a ni.

Carrom Board lamah te a timi deuh an tam avangin screening neih tur a ni a. Chess, Chinese Checker leh Draught Board te pawh an rawn keng tel a, kei pawh Pu te'n, "In tel dawn sia, zuk kal ve rawh" min tih avangin ka zuk kal ve a.

Carrom Board vel an pen lai chuan mipa pakhat hian Draught Board a lo keng a, "I chhuak ve dawn a mi?" ka tia.

"Chhuak lovang, kei chu ka thiam vak lo, saw.. sawta mi saw kan department ațang chuan a tel ang, midang ho kha chu ka hrelo"

"A chhuak tur zinga mi kha ka nia"

"E! hawh, lo khel chhin ang hmiang, i peih em?"

"Pawi hleinem, practice tam ka mamawh a"

Midangin an rawn en ve bawk a. Kan khel a, min dah nil nghal. Ka zak ve det.

Midangin an rawn en belh zel a, min bial laih laih a. Kan ti țha leh ngat a, min dah nil leh ta. Ka zak ve ta viau. Ka bing deuh mem mem a. Ka țhianpa chu, "I tel ve dawn a mi?" an tia. Ani lah chuan "Tel dawn lo, ani hi a chhuak dawn sia, ka practice pui mai mai" a la ti zui.

Mahse ka tlawmla ta riau. Kei group aiawh a chhuak tur ngat, kan group ațanga chhuak phalo in vawi 2 ngawt min dah nil khanglang a.

"Vawi 1 ti leh ang"

Ka tlawmla tawh laklawh. Ka thluak ka sawr a, ka ngaihtuahna vak darh ka huikhawm a. Ka dah nil ve tur ani ringawt tih chu ka thupui a ni. An rawn kil țuau țuau a, match kan țan leh ta a.

Kan sawn a, kan sawn zel a. Mahse a vawi 3 na ah zet chuan a changtupa a țang ve ta. Theihtawp ka chhuah ve tlat tawh, ka thluak ka hmang ve tlat tawh. A hma kha chuan ka uluk lo lutuk a ni tih te ka ngaihtuah vel a.

Mahse ka nil leh ta tlat mai.. an ngawi țhap a. Kei pawh ngawi rengin kan office lam pan in ka chho nghal daih. Ka chhuak ta lo chiang a ni.

JOJO-I

Kan zawhte a ni a.
Ka fanu Kimkimi'n a hmingah Jojo a phuah a.
A nu nge a pa tih kan hre har hle a.
A nu anih chuan Jojo-i
A pa anih chuan Jojo-a kan ti ang kan tia.

Țum khat chu a puitlin tawh hnu in a pi in a keu kak vel a, kan bih ngial hnuah a nu tih kan identify theih phah a. A confirm nan kan keu kak lai thlalak pawh kan nu unaupa Vety Doctor kan thawn thlap.

A pi hian a ngaihsak ve phian a. An inngaihsak deuh mah mah hi chuan steel almirah ah an inkhung nileng palh leh țhin.

A taima vak lova, a man phak loh tura sazu thawm awm chu a maimitchhinsan mai țhin. Sazu tih vel hi a sehhlum ngai lova. A man ve pawhin a chhaih chau țhin a, kan vuakhlum sak fo. Kan vuakhlum sak loh chuan a tibo leh nge nge țhin.

Hman zan khan Pu Rca nen inkhel kan en dun a. Pawnah kan chhuak zawk a. Kawngka bula kan din laiin eng a thim thut a, a zawhte ber mai kha a mutna ațangin hmanhmawh tawkin a thim hlau (?) kha kan bulah a lo tlanchhia nih chu.

Bialpa ve deuh a nei a. Zawhte var a nia, a hur laiin a rawn hel țhin a. Mahse no a neih kan hlauh avangin kan inhmuhtir duh lova. Mahse kan hriat lohin zan 2 vel chu a riak bo.

Hman zanah kawngka pawn lamah a bialpa a lo ngiau a. An inko sek a, an inhmu thei silo. Jojo-i pawhin inchhung kawngka bul doormat ah a hmangaih ber tan a vawikhat nan a riah phah ve ngat kha. Ka zan zungin ka hmu a, ka khawngaih ve țep a ni.

MASI PUTAR DAWHTHLAK

Kum 10 dawn hnu ah ka fanu Kimkimi'n min dawhthlak tir ve e. A nu leh pa te kan va lawm tak em!

Ka nupui neih tirh lai vel te ka ngaihtuah chhuak uai uai mai.

Kan nu pa (puzawn) te bula Christmas kan hmang te kha, kan kum la tam lua hek lo. Kan nu ber mai khan a nau te tih thikin urlawk zanah thleng an dawh ve ngei zel a. A va naupan chhiat thlak thei tak

Chu chang a la nilo, min khawngaih ve nge ni, "Thleng dawh ve rawh" min la ti ve ngei zel a. Nui liam ta mai lo chuan kan dawh ve ngei ta țhin anih kha.

Ka ngaihtuah let leh țhin a, ka Puzawn te tan khan Makpa thleng dawh a dah tur hriatthiam a har thei ngawt ang . Ka Pizawn nen khan an inrawn nasa ve thei ngawt hian ka ring țhin!

Thil common lo tak, Puzawn (Masi Putar) thlak atana thleng dawh tawh Makpa ka ni ve tlat

MIZO KRISTIAN TE HI

BJP in Hindu ram ah India siam an tum. Mizo te pawh Hindu ah min siam vek an tum kan ti a. Keini Mizo Kristian te chuan kan lo ngei ve em em a.

Enge kan dinhmun ve le? Keini Kristian te chuan India chang nilo, khawvel hi Kristian rama siam kan tum a ni lawm ni? Mizo mihring tlemte hian Kristian Missionary engzat nge kan tirh chhuah? Kan Missionary tirh ang vel hian Hindu ho hian Mizoram ah Hindu Missionary rawn tir ve ta se, kan va țeu nasa dawn em!

A hrim hrim in, Hindu sakhaw upa tawh lutuk, a ruh tak tak (vai hnam țha pangngai) tan chuan, India ram State hnufual ber pawl, rethei leh pachhe tak ațanga, an ngaihsan loh Tribal Missionary kan tirh te thu lo awih mai hi ava har dawn tak!

Khawvel ropuina ațanga thlir chuan kan tling lo dawn em a. Kan nun hian zir phawt se chuan, kan tapchhak zawla buh lak tur awm sa, heng muția, mistiri ilo fahran (an sakhaw zuia rau lo ve tak tak) te pawh hi kan ti Kristian thei mahna. Kan Kristian nun rawn hmu hi chuan Lal Isua zui an chak mawlh lo hian ka hre țhin.