THLAHRANG

Tunlai chu Rc Bittachon Chhakchhuak hian thlahrang a tuipui riau mai a. A mi sawipui a zarah hmana ka thlahrang tawn ka hrechhuak zawk mai.

Kei hi, thlahrang hlau lutuk ka ni a. Thlahrang hlau viau e tilo chuan thlahrang hi ka awih țha duh der lo mai a. A hrang an tih pawh hi thildang ni turah ka dah tlat zel. 

Hmanlai hian nilovin țum khat chu, Aizawl ațanga Mamit lama ka haw thla hi Lengpui ka thlen chuan khua a thim der mai a. Mahni chauha Bike a kal ka ni a, Aizawl ațanga ka chhuah dawn khan khua in min thim hnan dawn tih ka hrereng a, mahse dawih nih ka duh loh avangin a tlai a tlai in ka chhuak kha a ni a.

Lengpui Zero Point a restaurant ah thil tlem ka ei zawh chuan kal leh mai turin ka in ring a. Kei, thlahrang ring lem lo khan thlahrang ka hlauh miau avangin rilru ah a rawn lut tlat mai a, thildang ka ngaihtuah thei meuh lo. Aizawl to Mamit in kara an sawi hran lai te ka ngaihtuah den den a, tlan chakna lai tur te ka rilru a suangtuah zung zung pah chuan ka tlan leh ta a.

Ruah phingphisiau sur seng seng sela, chhum zing chiai mai bawk sela chuan a  thlahrang tawnna nikhua viau maithei. Mahse khua a țha em em tlat mai a. Kawng pawh bike head light in a chhun chin chu a lang chiang kher mai. Nidang ang bawkin, thlahrang hlau tak chungin, hmu lem lovin Mamit ka thlen leh mai ka beisei a ni.

Lengpui dai, in awmna chin ka pel a. Thlahrang ngaihtuah loh dan țha ber nia ka hriat 'Pastor leh Kohhran Upa hriata sawichhuah loh chi' ngaihtuah ngial ka tum țhin a. Ka hlauhna chuan thlahrang bawk min ngaihtuah tir leh țhin. Ngaihtuah ber na na na chu ka tawng dawn ni te hian ka in ringhlel rum rum tawh mai a ni. 

Dialdawk lam ka pan zel a, ka tluang viau a, a hma deuha motor pahnih khat bak motor dang ka tawk lem lo. Chutia thlamuang taka ka tlan lai chuan, karei leh! Hmulthi zawng zawng ding vek, thin sa zawk khawpa phu nasa in, ka hmuh chak loh ber leh ngaihtuah nasat ber mai thlahrang kan hmu tehreng anih kha! Ka thau ah mi man a, ka tha a khur der der mai a ni.

Ka ding chiang kher mai! Bike headlight in a chhun fuh loh chin, ka hma kawi ah tak chuan thlahrang film a kan lo hmuh țhin ang, kawr var kher ha, hmeichhe samsei sam thlah, thlahrang full dress a inthuam ngei mai chu a lo ding anih kha! Thlahrang na na na chuan min hmu dawn chiang si a. Mamit lam pana ka kal luih dawn chuan, chuan ve a tum awm si a. Tlan tlang luih ka tum chuan ka bike a tlan muang ang a, a hnungah hmuh theih si loh, phurh nei si a muangchanga kan tlan dun tur ka ngaihtuah ringawt pawh khan, ka hlau lutuk kha Lengpui a kir ngei ngei kha a țha zawk in ka hre ta a.

Chutia Lengpui lama kir leh mai ka rilruk lai chuan, chu thlahrang che miah lo mai chu ka huaisenna zawng zawng nen kan hnaih leh hret chhin a. Bike headlight in an chhun fuh chat mai chu thingbul a saiip var (cement bag ruak) an dah lek lo niin, han enchian nak chuan a lo thlahrang lo nasa mai si a. Thlahrang tak tak lo nise zawng, ka chak lo teh ang chu.

Mahse, rilru a ka lo hlauh tawh em avangin chu cement bag ruak chu a hran tak tak tak thutin tih thu hlaah a hla thei ang bera helin chak deuhin ka tlan pel fua ta anih kha! 

Ngaihtuahna ka kawm zui a, thlahrang lam ka ngaihtuah reng avang khan ka mit khan hmuhsual theih hmasa ber leh remchang ber mai kha an hmusual ta kha a ni a. Thlahrang film a kan lo hmuh țhin ang tak kha, rilru in a lo suangtuah avangin, khatiang ang ngei khan kan hmu ta reng bawk a. Rilru hian min lo va hruai thei ngai em!

Lengpui lamah khan lo let leh ta ila....

Kha hmun kha tamtak chuan an sawi hrang chhunzawm ngei ang. A chhan chu a taka tawngtu / hmu tu ka awm dawn miau si a! A chhan min han zawt ang a, ka hmuh bak kha, tlem kan sawi hlauhawm belh ngei ang a, a sawi chhawngtu te'n tlem tlem belhin hmun hrang tak chhuah in an chhuah mai dawn a ni. Tamtakin 

'hmanah pawh thawm kan hre tawh reng a ni..'

'truck driver pakhat pawhin khu hmun ah khuan thil dum zun, phe zeuh a hmu tawh....'

tih vel sawi belh tur a awm zut ang a. Thlahrang awmna hmun pakhat kan hmuchhuak a lo ni reng mai dawn a ni. 

Chuvang chuan kan thlahrang hmuh emaw hriat tamtak hi chu, kan dawih luat avanga kan fiah ngam loh țhin avanga kan sawi hran tak tamtak a awm țhin reng a ni.

HLA PHUAH KA BANSAN

Hman deuh ah tawh khan, PHE lam huaihawt deuh niin ka hria. Tui hna humhalh tih lam hawi ah hla inphuahsiak vel kha an huaihawt a.

Pakhatna ațanga pathumna khan lawmman an dawng dawn bawk si a. A lawmman tur kha ka it ve bakah, ka unau (cousin) te zingah khan 'tel ve ila chuan, pakhatna ka nih mai' min beisei pui ve deuh tu te kha an awm a.

Uluk tawkin chang 3 leh a thunawn kan thehlut ve zan a. Beisei ve deuh reuh, beisei ngam lutuk silo in ka nghak ta vang vang mai a.

Result puan ni khan phone kha ngaihsak lo ang deuhin, tumah hriatpui si loh khan ka bih ve deuh sek a, khalam hawi post engmah ka hmu ta lova. Ka nghak leh deuh a, a tuk thum tukah (ni ta in ka hria) kan unaunu thawk ve kha inthlahrung takin ka zuk zawt dek dek a.

'Hla inphuahsiak result vel kha an siam ta na nge?' ka tia

'Siam e, lawmman dawng ho chu an hrilh lawk vek a, a hmunah khan lawmman an pe nghal vek alawm'  a lo tia

Khata țang khan hla phuah ka bansan leh ta a ni 🤣🤣🤣

Krismas Thawnthu tawi - BLUE CHRISTMAS

    Mi zawng zawng chu an hmanhmawh em em vek mai a. Kei pawh ka hmanhmawh em em mai a ni. A chhan chu, Christmas hmanga haw tur ka ni tlat.

    Ka hna avangin awl leh hahdam hun neilo țhin mah ila, Christmas hun hlimawm tak leh am taka hman ka duh avangin ka chawlh ka lo khawl ngat ngat a. Hun rei zawk Christmas hmanga chawlh ka tum em em laiin, țul danga pawh pen ka nih thut avangin Dec 24 tlai dar 2 ah ka chhuak hman chiah a ni.

    Hmanhmawh em em in ka car ah chuan ka lut nghal a. Ka helhhawlh nasa kher mai. Darkar 6 vel zet mahnia tlan a ngai dawn si a. Ka car ka tinung a, kan khua panin mahni chauhin ka Christmas zinkawng khawhar tak chu ka zawh țan ta a.

    Cigarette ka țan a, Car tape ah hla ka zai tir nghal a. Tetei Ralte Christmas hla chu ka zawm nghal rat rat, 'Kumpui sul pawh a lo her leh dawn ta....'. Khawdai ka thleng a, zunram ka thiar a. A vawh em avangin No 2 ka lem sak a. Ka chhungte ta tur thawmhnaw leh naupang lawm te, țhiante ta tur 'a um' nen, thlen hlan nghakhlel takin chak angreng takin ka tlan ta a.

    Rilru ka kawm melh melh reng a, kan naupan laia Christmas lo nawm theih zia te ka ngaihtuah a. Thlasik a in țan a, naupang kha chu ngal a chat a, hmui a rep a, ke sir a khi a, hmai a khing, mahse kan hlim tlat. Kan zirtirtu pa in, "Kan chawl vaaang vang ang a, nakkkum ah chauh kan lut leh ang" ti a kumtawp a min thlah avangin sikul kan chawl rei dawn tih kan hre ve tlat.

    Thlasik par in zia a lo chhuah a, vanlamah thlasik kawng a lang ruih a. Vengthlang ațangin pathlawiin a tape deck ah Siampuii Sailo a zaitir miau a. 'Eden Parmawi Chulhnu' a rawn ti miau alawm. A ti Christmas em em a, zingah a tape ri chuan min kai tho leh a, a ti Christmas em em zel a ni.

    Kan nu te Aizawl Bazar in thawmhnaw thar min lei hun tur a ni a. Silai lem leh halpuah kan nei dawn bawk a. A va nghahhlelh awm thei tak! Christmas dawn hnaih ah, chhungte mual liam ta te thlan kan chei par chuaih mai a....

    Ka lo chhing sek aniang, kawng thlang ka lo dai hman thuak a. Ka harh zawk a. Ka rilru ka kawm nasa lutuk a ni tiin, ka intiharh a. Reilote ka chawl a, Cigarette țan in ka tlan leh ta a.

    Playlist ka thlak a. Jim Reeves Christmas hla ka ngaithla thung a, chung lam a eng uar a, a hla a cool si a. 'An Old Christmas Card' tih hla an sak chuan suangtuahna ah min hruai leh ta a. Christmas Card kan inthawn țhin lai te, khang hunlaia kan thawn țhin te leh min thawn țhin tute kha khawnge an awm zawh tak ang?

    Kan naupan laia keini țhianzaho inkawm țhin te kha, khawnge an awm zawh tak? A țhen chu tunah chuan mual an liam tawh a, a țhen chu la dam mahse an thang na chin hriat a ni tawh lo. Zanin urlawk zan angah te hian min ngaihtuah ve ang em? Min hrechhuak ve ang em? An lung a leng ve ngei ang.
Chutia suangtuahna rama ka chen melh melh kai chuan kan car khalh chu a kawi zuai in ka hria a, kawng sir hi a rawn pawng chhuak zawrh in ka hria a. Ri bur in a zui a, ka mitsulh a. Ka ral riai riai in ka hria.

    Hmun pakhat ah hian ka lo awm reng mai a. ke pen a zang haih mai a. Winter Park reh leh khawhar ruih mai ah hian ka lo awm a. Kawngsir tawn tawn ah chuan thing hi a ding fur mai a, chutah chuan vur a lo tla var iar mai a. Chung thing ro kara vur tla var iar mai te chuan lung hi a tileng vawng vawng mai a. Hmuh an nuam in, mal riau in min hriattir a. Ka rilru leh thinlung chuan zawn a nei a ni.

    Chuta ka kal lai chuan, park laia țhutna khawhar em em mai ah chuan țhu hi ka hmu a. Chu chuan min hip tlat avangin ka va pan ta a. Chutah chuan hmeichhe pakhat hi khawhar hmel em em mai hian a lo țhu a. A lo ngawi reng a, vanlama arsi leh thlasik kawng inkham ruah chu a thlir vawng vawng mai a. Thlasik thli lo thaw zeuh chuan a sam chu a chhem leng seng seng mai a. A rimtui inhnawih rim chu a nam vang vang mai a. A vawh em avang chuan ka jacket hak chu ka pawt sauh sauh a.

    A earphone a hla chu ka hre thei a. Jim Reeves a hla, Blue Christmas a lo ngaithla a lo ni a. A mittui hnam chu a lang thei a, hruk a tum hran lova. Kei min bia niawm takin a țawng chhuak a. A kawppui a ngaih thu chu zawi te te hian a lo chham melh melh a. Lenrual zawng te'n chhailai D țang belin hlim zai an vawr a, ani erawh chu mal takin mahni chauhin chu hmun khawhar ah chuan a hun a lo tum tawi niin, ka khawngaih kher mai.

Ka lam a lo hawi a, a mittui a tling piau mai a. Jim Reeves chuan,
I'll have a blue Christmas without you
I'll be so blue just thinking about you
Decorations of red on a green Christmas tree
Won't be the same dear, if you're not here with me.
And when those blue snowflakes start fallin'
That's when those blue heartaches start callin'
You'll be doin' all right with you Christmas of white,
But I'll have a blue, blue Christmas.
tiin a mittui chu a lo koh chhuahsak a lo ni.

    A darah ka vuan a. A biangah ka vuan chho a, a biang nel leh vawt hen mai chu ka kut chuan a khawih a. Mittui tling piau chunga min melh paha, a țap tur heh pet fan fan chu ka hmu a, a bula țhut pahin ka awmah ka kuah bet a. A țap hawm hawm ta a. A thlamuangin a hahdam huai tih ka hre thei a. Kei pawh chu thlamuanna leh lungawina chuan min fan rang kher mai.

    Chu hmun khawhar leh reh ruih mai ah chuan la inhmu ngai reng reng lo, mahse thinlunga inhmu sa niawm renga mawi, keini pahnih chu kan inkuah vawng vawng a. Winter Park khawhar tak thutna hlui zet ah chuan thu dun in, a chanchin chu heti hian a sawi ta melh melh a.

    “Chhungkaw pangngai taka khawsa a, seilian ka ni a. Kan unau ah chuan a zezawi leh rual pawl tam lo ber pawl ka ni a. Ngaihzawng hi ka ngaihsak em em lova, mahse a hming chuan ka nei ve tawh tho a. Chuvang chu aniang ka neih chhun hi ka la thutak ve thei em em mai a. Ngaihsak lo viau mah ila, nula ta nafam chuan han rim der tu kan tawng ve fova. Mahse ka uksak lem lo, ngaihzawng ka nei peih lo a ni ber ang chu. Mahse hmangaih ka tawng ve ta tlat mai a. Kan intawn dan pawh hi thil pangngai tak ni tho mahse, ka tawn ah chuan mak ka ti.

    Hnathawk in kan khua ah a rawn awm a. Ka ngaihsak hran lova, ka ralkhat hriat ringawt mai a ni. Mahse hun a lo kal zel a, engtikin nge engtikah nge tih ka hre mai thei lo. Kan lo in hmel duh ve ta a, mahse ngaihzawng nei ngai lo tih takah lak thutak vak loha, ngaihsak em em loh hram ka tum a. Min han biak sek te hian nin chang te ka nei thin. Mahse hun a lokal a, ka hriat mang loh karah ka thinlung chhung hmangaihna a rawn ti nung ve tlat mai a. Beisei loh deuhin ka hmangaih ta bur mai a. Amah pawhin min hmangaih em em thin a ni.

    Hun a lo kal zel a, an hnathawh tur an thawk zova. An khaw lamah a haw leh ta a. Chutah tak chuan a ni ka lo hmangaih hman zia ka hriatchhuak tak ni. A awm lo chiah chu ka engkim hi a tawp nghal vek a ni mai a, ka khua a har a, ka ngai ngawih ngawih reng mai a. Engkim ka tawn leh ka hmuh te hi a hmuh ve atan ka it vek mai a. A tello chuan engmah hi a mawi thei lova. Hlimna zawng zawng te hian min thlawh bosan vek ni mai hian ka hria. Ka engtih mah a tui thei lova, a tel lo chuan minute leh darkar tin hi ka khawhar em em reng mai a. Ka chaw ei a tui lova, ka thil ei theih loh avangin ka cher phah vek hial a ni.

    Ka biak reng loh chuan ka khua a har zel a, ka be zo hi ka khua a har leh nghal zel a, enge a tih mek a, engtin nge tunah a awm mek tih zawng zawng nen hriat kelh ka duh thin a. Amah pawhin ka ngaih ang chiah in min ngai a, min be ve reng bawk a. Zing thawh tirh atanga zan mut thlengin kan thil tih zawng zawng in hrilh tawnin, chhunni zan kan hmang liam thin a. In hmuh hlan nghakhlel takin, rinawm taka awm tura in chah mawlh mawlh chungin biahthu kan in hlan fo thin a ni.

    Hun a lo kal zel a, mahni buai buai a buai ve takah chuan engtik lai pawha in be reng thin kha, in biak khat chang a awm ta zeuh zeuh a. Ka theihnghilh mek a, ka duh lo mek tawh pawh a nilo, khawvel hun in her in nitina in biak reng a rem loh chang a awm thin a. Kei lah zirna leh thildang avang in buai riau chang ka nei fova. Amah pawh buai chang a nei tho thin a. Mahse thinlung hmun khat kan la put tlat avangin hun awl ah chuan kan la in be reng thin a ni.

    Tum khat chu ka thiannu in ‘in in hmu thei silo a, in ngaihzawn reng leh rinawm reng in peih e, amah pawh hian a ruk in an khuaah bialnu a nei hrim hrim’ min ti chu ka sa zak mai a. Hmangaihna dik tak hlut zia te, a aia thil hlu leh ropui khawvelah a awm loh thu ka hrilh hrep a. Ka hmangaih ang bawka min hmangaih ve thu te, kei pawhin tumah ka neih san loh avanga amah pawhin tumah min neihsan ve loh tur thu te chu inringtawk takin ka hrilh a. Thihna chauh lo chu min then thei an awm ka ring lo a ni.

    Mahse kan inbiak khat sawt zia te, a haw tirha a thikthu chhiat zia leh tun hnua a thikthu chhiat loh sawt zia te ka ngaihtuah chuan tlem chuan mak ka ti ve deuh tan ta a. Ka in ngaihtuah ka in ngaihtuah a, ka in ngaihtuah ngaih thalo zo ta a. Ka bia a, ka tan a rinawm reng theih ka rin loh zia leh min kawp ka rin zia te ka hrilh hrep a. Zawldawh deuha ka thusawi a ngaihthlak zawh chuan, ka tan a la rinawm reng thu leh min la hmangaih thu a rawn sawi meuh chuan, ka in thiam lo leh hnuhnawh in ka hnuk a ulh a, tap feih feih chungin ka hmangaih thu ka hrilh let ve leh ta a. Chu chu kan in hmangaih thu kan sawi hnuhnun ber tum a ni dawn tih reng reng ring phak lo.
    

    Hun a kal tam zel a, khaw hmun lo ta chu in be tha reng mah ila, inbiak a khat telh telh a, Kei pawh a tello in tlei zolo mah ila, tlem chuan ka awm thei ve viau tawh a ni. Chutih lai chuan ‘A nupui ruk thuthang’ ka hre ta thut mai a. Ka awih lo hulhual a, mahse zawh fiah ka tum a, ka call a la thei silo a, ka whatsapp lah a en thei der bawk silo. Ka mangang em em mai a. Finfiah ngei ka duh avangin zah pawh dawn lovin, ka chhungte bulah chhuanlam dawrawm te te siamin an khua ah ka kal ta tawp mai a ni.

    Zan dar 8 a rik chuan an in kawt ah chuan ka ding vang mai a. An in lamah chuan thawm a awm neuh neuh avangin ka lut mai ngam lova, hla deuh hlek, thim laiah chuan ka ding vang vang mai a. ‘Lo ru ta se’ nilo, kei lo chu nupui a nei thei lo, a chhan chu ka hmangaih tlat alawm, ka hmangaih avangin amah pawhin min hmangaih ve tur a ni. An in chhunga an ri deuh laih laih saw, ‘kei min nei’ tura min lo hmuak nise ti te in duhthu ka sam a. Ka nui deuh sak a, in ringtawk takin an inchhung lam ka pan ta a.

    Ka luh hma deuh, kwngka pawn atang chuan chiang takin ka hmu thei ta a, hmeichhe pakhat nen nui chungin an ding dun ka hmu chiah chu ka ding chawt a, an thian te’n thla an lo kalsak mek anih chu! A ni theilo, hmeichhia saw keimah tur asin! Ka mit ka nuai a, ka ennawn leh thin a, keimah ka ni thei silo. Ka hmangaih saw, midang bulah a ding theilo, amah nilo in a unau te aniang, nilo amah ngei a ni. Ka inhrilh mawlh mawlh a, mi a ang maiin ka phun mawlh mawlh mai a ni.

    ‘Kal rawh’ tia ka benga hrilhtu awm avangin, ka in her a, an in hnuchhawn in ka kal ta ringawt mai a ni. Khawnge ka pan dawn, khawi lam nge ka pan pawh ka hrelo. Ka rilru ngaihtuahna zawng zawng hi a ruak vek a, mittui tla par chuang chuan ka nui sen sen a, in ngaihtuah lungpuam tur pawhin ka rilru ka hmang thei lo, ka vai ruai a, ka chiang lo a ni. Kawngpui motor tlan zut zut na lam pan chuan ka kal lai ka hria.

    Taxi ah thi hnuangin min zawn lut a, Casualty a doctor in ‘tunge a chhungte in awm em?’ a tih ri chu ka thil hriat hnuhnun ber a ni ta. Ka ral riai riai a, ka ral hlen ta a ni.”

    Winter Park thuthlenga chu thu ka ngaihthlak mek lai chuan, ka ngaithla tui bawk aniang. Ka lo tang rilru ve teuh mai a, ka rilru chuan khawngaihna leh lainatna nen, ka kuah leh vawng vawng a. Ka vawikhat hmuhna ah chuan ka lung zawng zawng a ti awi vek mai hian ka hria a. Khawvel thildang reng reng hi ka ngaihtuah thei lo. Engkim mai chu a mawi vek mai a ni.

    Ka tana khuanu ruat dik tak ni ah ka ngai hmiah mai a. Thlah ka tum tawh lo reng reng, a sam ka chul sak heuh heuh a, hlimna zawng zawng in min fan in ka hria a. Chu nu pawh chu a thla a muang in, tun hma a hlimna zawng zawng a nei let leh mek ni hian ka hria a. A hlim hmel chuan min ti lungawi hliah hliah mai a, kan kut chu in chelh tlat in lungawi em em in kan in en ngawih ngawih mai a ni.

    Chutih lai chuan min phih lawp tu awm hian ka hria a, ka harh zawk a. Ka car accident chhungah thi nen in bual nuaiin ka lo awm reng mai a. Company motor leh hnathawk ni awm tak te hian min lo buaipui mek a. Kha suangtuahna hlimthla, thamral leh mai tur ka ui lutuk chuan maimitchhin leh a, kha hmuna awm leh mai ka tum a. ‘Khawngaihin min kalsan r’u’ tiin ka au a, mahse ka aw a chhuak thei tlat lo. Kha hmun kha kalsan ka duh mawlh lo.

    Ka duh lo chung min zawn chhuak a, tan ka tum ngial a, mahse tha ka nei silo. An motor ah min zawn lut a, hmunpui lam panin min phur nghal a, ka lungawi lovin ka khua a har ta em em mai a. Kha nula in a sawi kha a tak a tak a ni ang em? Nge ka suangtuahna mai mai? A finfiah theih nan a hming emaw khua tal ka lo zawt lo chu ka ui hle a ni. Engtikah mah ka hrechhuak dawn ta lo anih hi tiin tawnmang lasi, thamral lo mitthla a cham reng tur chu ngaihtuah neuh neuh pahin khawhar takin, Damdawiin lam pan chuan chu urlawk zan chuan min tlan pui ta vang vang mai a ni.