SA KA HMEH VE LO

 (A tak tak ania, anmahni hian an chhiar ve ka ring lem lo bawk a, kan ziak mai ang e)

 Hmanah kan zin a, kan zinna ah tlai chaw (zanriah) kan ei nghal dawn a. Kan tlem hle nain, min sem darh ve nual a, kei a hminga motor keng ve ta chu a hla lam, veng tawntirh lamah min dah ve ran mai a.

 Ka thlenin (chawi eina tur te) kha lo in ring lawk hek lo le. Sa pawh an lo hmeh lem lo ni ngei tur a ni. Pathianni tlai a ni bawk nen, a hminga mikhual nei ve ta chu sa hmeh loh kha an lo inthlahrung khawp mai.

 Tlai chaw ei hun deuh thuak tawh a mikhual nei tur tih in hre chauh an ni bawk sia, leina hun leh hmun tur awm hek lo le. Țhenawm te ta suah te kha zawi te te in sawi a, hrelo ang deuh in ka awm a, ka lo hre pha ve reng sia.

 Pa ber nen kan titi chhunzawm a, an inthlahrun loh nan, "Sa hmeh a ngai reng reng lo ania, engmah ti buai duh suh u" kan ti ngial a. A hma deuha ka sugar neih thu te sawi chhuak in, "Chu lovah, hei ka thisen ah sugar te an hmu a, sa phei chu in sum ka ngai hrim hrim" te kha ka tih belh nual a. Ni e, ka normal vek tawh a, sa phei chu ka ei hnem thei in, an inthlahrun loh nana sawi mai mai ka ni.

 Chaw ei an siam a, kan kil bial laih a, an mikhual neih chhuanlam in, an nu ber khan an țhenawm te vawksa kan a lo va suak a. An sa suah lah chu chhawp ta mai lovin, nu ber khan hrang hnih vel te te in thleng ah a rawn sem ta diat diat mai a. Ka thlengah a rawn dah dawn chiah a, pa ber mai khan "Sa a ei ngam lo, a ei thei lo, sugar a nei a" a rawn ti chiah mai chu, "a va zialo ve aw" tiin min sem kan hmak mai a, hrang hnih chang hoin hrang thum an chan theih phah a. Keimah chauh in sa ka hmeh lo.

 "Ka ei thei tho ania" han tih kha a chi tawh mang si lo a. Sa a ngai kher lo tih kha ka lo sawi thui mah mah a ni ber mai. An chhungkua in keimah vang in sa an hmeh phah a. Midang tan malsawmna ka ni ber e.

SANGHA LU KA TI BO

 General Conference, Khuangthing ah a ni a. Kohhran in a tam vak lo nen, keini engah vak mah pawimawhna nei lem lo, rau bawk si lo, tleirawl chhuak sam sei lai ni bawk nen, veng hmawr lam, Kohhran dang in ah min dah ve ran mai a. Ka la zakzum hle a ni.

Haw lam thlalak,
Thasiama Se No neih na

 Inrinni tlai ni ta in ka hria. Sangha lianpui kan hmeh a, mikhual ningkhawng la hre vak lo ta chuan, thleninpa suah hmain a sangha lu kan suak nghal hmiah mai a. Thleninpa in sangha lu a zawng ta a, a fanu chawhmeh dang suak mek bulah, "Mami a lu kha i suak na nge?" a ti ta.

A fanu lah chuan ka sangha lu suah a rawn hmu kur mai sia. Kei lah chuan "Hei heta hi a awm e, kha...." ti ta mai lo chuan, ka zak deuh bawk si chuan chaw karah kan thuk ru teh reng anih kha.

 A lu a lian si a, langchhuak tawk a awm lo thei lo, chaw karah lo lang lai kha ka kut in ka hup pah bawk a. A fanu lah a ngawi kar mai bawk sia. A pa chuan a zawt nawn ta rih lo. Mahse chaw kan bar țan a, "Sangha lu chu khawnge maw a awm le" vawi hnih khat chu a ti leh a, țan a na duh kher mai.

 Chutah tak chuan ka talent fahrah ve tak, thil eiru thiam ka nihna kha hman hun a ni tih ka hre ta a. Sangha lu chu ka zawna țhu thleninpa hmuh lohin, ka thian zauh zauh reng a, fimkhur erawh a ngai khawp mai.

 Mahse dawhkan zimte kil ho na na na chuan, chaw ei chhung zawng hmuh loh thu awm hek lo le. A thluak vel hip ruk a buaithlak nen, kan inmanchhuak ta nge nge in ka hria. Mahse ka lo ei filh tawh em a, min dil let ta bik lo. A hmulo der ve tawh aniang, sangha lu a zawng ta bik lo.

 A tuk ațang chuan ka fimkhur ve ta a. Zinga chengkawl kan hmeh leh pawhin, thleninpa duh zawng anih ringin, a thau țha țha suah palh hlauin, a cher cher nia ka rin ka thur nalh nalh tak kha.

BLUEMOON

Part 1

 Kamkuena

 Nipui khawlum huam huam hnuaiah ah chuan bag rit tak ak chung chuan ka kal ve tauh tauh a. Ka thahrui neih zawng zawng chu ka hmang tak meuh meuh a. Ka thluak chuan kal a ngai tih a hria a, ka taksa peng tin mai chu thu a pek angin theihtawp an chhuah tak meuh meuh a ni.

 Ni e, adventure lam ka tui ve miau si a. Han chhuah tak tak chuan ka taksa chuan a tlin meuh pawhin ka hrelo, mahse ka rilru chuan a tlin ve in ka hre miau si. Naupan lai atanga ka chak em em thin a ni a. Seilenna in zir loh avang leh hmeichhia ka nih miau avangin ramhnuai kalna hun ka nei lovin, a tak tak ah chuan ka la kal ngai lova. Tv leh Internet vel chauha kan lo hmuh thin, ramngaw kara tui luang awmna hmun pana kan College Adventure Club kan han kal mek pawh chu chhungril ah chuan ka hlim ru veng veng mai a ni.

 Ka ke chuan pen a duh a, ka ke tha chuan chu chu hriain kal thei turin hma a lakpui a. Ka pen tauh tauh a. Ka kut chuan ka bag hrui chu a man bet tlat a. Ka bag hrui innghahna ka dar lehlam lehlam ah chuan ka thil ah chuan a rihna neih zawng zawng a pe khawm a, chu chu ka hnungzang chuan hriain a theihtawpin a lo dopui a. Ka ka pawh chuan awl mai tum bik lo in theihtawp chhuahin “heiha…huiha…” a lo ti ve dat dat a. ka thlan tui te lah chuan ka taksa chhung a bibo mai tum lovin mi puih tum niawm fahranin an rawn hnam chhuak a, chu mai duhtawk lo chuan a luanin an rawn luang chhuak zawih zawih a. Ka taksa peng tin mai chu awl bik awm lovin  theihtawp an chhuah hlawm a ni.

 Chho ulh lai ka kal chhoh lai chuan a hahthlak ngei mai. Zawl ka thleng tep a, chu zawlah chuan chawlhna nuam a awm a ni. Zawl ka thlen chiah chuan ka thian te chu min lo va kalsan rawh u tiin ka ding khawmuang ta a, ka bag ka nghat a. Herhse kung ngheng chuan zo thlifim ka dawng a, ka bag atang chuan tui bottle phawrhin tui ka thiat nghal bawrh bawrh a, ka thlan ka hru dai a, thli chuan min chhem dai sawng sawng a, ka harh sawng sawng mai a. A manhla ngei mai.

 Ka kal leh vat loh chuan midang chuan min kalsan thui lutuk ang tih ka hlau bawk sia, chu thlifim chu la thlahlel tak chung chuan hmalam ka pan leh ta a. Kawngsir a hnahah te chuan laiking nipui nilum ai chu a awr tisenin a lo bawk ar ar a, an nun zalenna chu a awhawm ngei mai. Ral leh lamah chuan rengchal leh ngirtling niawm tak tak te chuan lenlai chenin khuang an lo chawi bawk a. Chung lam ah chuan vamur leh pengleng te chuan boruak lal ka ni ti niawm takin an leng zuau zuau a. Mute thlifim dawng chu a lo dir char char mai bawk a. Tlaiberh te lah chuan thing chungah infiamin an chiar nak nak hlawm a. Choak rawn thlawk awmchhun chuan muang ban cherh chawrh in ’ak..ak..ak..’a rawn ti duai duai a. Rapawm zawng a ngaithla duh tan chuan a rapawm thei lek lek ang a ti a ka ngaihtuah lai chuan kawng sir a huan kara thlam pakhat luhkha ah chuan putar lu tuak var vo tawh hi a lo thu reng mai a. Pitar putar te’n mit an lak loh nen, mak tak mai in chu chuan ka mit a la tlat a, chu lam chu ka va pan hnai leh rih a.

 Chupa chu ka thlir vang vang a a banah chuan ser nge tattoo zawk ni? Enge a awmzia pawh hriat hleihtheih tawh loh chu a in rin riai a. Tattoo pawh ni tehreng se, a fiahlo a nilo a, a ban vun chuar tawh avang chuan eng lem nge tih a hriat theih tawh lo a ni zawk mah ang. Amah chu pa tar lam tawh, kum 70 chuang fe tawh a nih tawh a rinawm. Mahse, hna a la thawh theih hmel fu tho rual chuan a taksa chu sakruang a ni mai a, han sawi belh viau turin taksa mawina, thatna, chakna a nei tam tawh lo tih a hriat a. A nun chawhnu lam hmang tan tawh. Zang kul lek lek tawh, he khawvelah hian a tawn tur ang ang tawng kim thawkhat tawh, tawn loh a la nei anih chuan thihna chauh a ni mailo maw tih tur khawp a thil chi hrang hrang tawng tam ve tawh a nih a rinawm.

 “I hah tawh awm emai, lo chawl hahdam rawh” tiin min lo rawn bia a, midang a bia a nih takin, ka hawi kual te te a, mahse keimah chauh ka awm si a. Ka rin aiin a hawihawm in, ningkhawng a hriat hmel fu mai. Ka hah bakah thlam chhung ka hmu chak bawk nen chuan ka han teilut ve ta rawih a.

 Tapchhak a thingpui bel ung zeta atang chuan thingpui hang tak fe mai chu thli chhuakin,

“Kha in rawh” tiin mi rawn pe a, kei ten chhe mi tih takah a no ung bawk nen, khawlum nen ka in chak lo kher mai. Mahse han hnial chu a hawihhawm loh thlak ka tih avang chuan no chu kan dawm satliah ve a.

 Kan kal tumna te min zawt a, Eng engemaw sawia kan ti ti luam hnu chuan kal mai ka han tum a. I hming pawhi la sawilo a tih takah chuan, Zorinsangi ka nih thu leh Rinsangi tia min koh thin thu ka hrilh chuan, phawk fe hian a rawn meng a. Thlahrang a hmu ta amaw tih mai tur hian min en min en kal mai a.

 Zawi te te hian eng engemawni sawiin a phun nuah nuah a, kalsan ka tum lai tak chuan “I hming chu a mawi hle mai” a rawn ti chhuak phawng mai a. Ka nui sak a, “Ka Pu, ka kal mai ang aw” tiin ka chhuahsan ta a.

 Ka kal leh hnu chuan kha putar khan ka hming ang tuemaw ber atangin engemaw tak a tawng tih a hriat hle in ka hria a. Enge a tawn tawh a? Enge a phawkna chhan em em te pawh hriat a chakawm hlein ka hria a. Hriat ka chak ta tlat mai a, hun ka nei anih phawt chuan ka tlawh leh ngei ang tiin ka in tiam rilru a, ka thiante awmna lam pan chuan ka kal ta sauh sauh a.

Zan khat kan riah hnu chuan haw kan tum ta a. Mahse engemaw in min mawlh tlata ka hriat avang chuan ka chhungte ka hrilh lawk a, ka thiante ka chah bawk a. Thlam ah chuan chawhnu lamah chuan ka va kal leh ta ngat a, mahse a lo inkhar tlat mai a, pawnah chuan thu in reilote ka nghak ang a, ka thiante ka zui ve mai ang tiin rilru ka siam a. Phone ah chuan hla ka ngaithla a, thlam kawngkhar ngheng chuan ka maimitchhing vang vang mai a. Khawlum nen, zan hmasa lam ka mu thalo nen, hriat loh karah ka lo muhil daih mai a.

 Ka dara min rawn sawi chuan min ti harh zawk mai a. Kha Putar kha lo ni rengin, ka hming chuan min ko thei nghal nalh mai a. Ka harh zawk chu ka hamhaih ngei mai. Ni a lo tla tawh a, tihngaihna dang awm hek suh, thlamah chuan kan in zui lut ta a. Putar chuan eirawng a bawl nghal mawlh mawlh a. Kei lah mut kham lo chu ka ngawi deuh reng a, puih pawh ka tum lo, tum pawh ni ila, a phal ka ring lo, phal pawh nise ka thiam chuang lo ang. Ril a tam deuh tawh nen, a eirawngbawl chu kan ei dun mawlh mawlh a. Chaw eikham chuan thlam namthlak ah kan thu chhuak ta a.

 Thla chu a eng hle mai a. Țum dang ai mahin a eng zawkin a lang a. Vanah chuan a lang dumpawl deuh ruih mai a. Thlifim a thaw seng seng a, putara chuan meizial la chhuak in a a tan a, a fawp vang vang a. “Rinsang, kum 35 bawr vel chu meizial hi ka zu tawh lo asin” a ti a. “Ka Pu, nimin a ka hming ka sawi khan i awm dan kha a mak riau a, engemaw sawi tur nei i ang em a, khawngaihin rem i tih chuan sawi la, ka ngaithla chak asin” ka han ti a.

 Chiang zeta mi melh pah chuan, “Tunlai thangthar te hi chuan hmangaihna awmzia pawh hi in hre tak tak tawh lovang tiraw?” a han ti leh phawt a. “Ngaihzawng hi ka la nei ngai lova, hmangaihna awmzia tak tak ka la hre lo pawh a ni maithei” ka lo ti a. “Ih e, thawnthu sei tak asin..” tih pah chuan a thutna chu a han rem tha te te a. A thusawi hriat kim loh hlau chuan ka phone chu flight mode ah dah in voice recorder ka on ta a.

Part 2

 Ka pu chuan a chanchin chu a sawi țan ta a

 I hming i sawi khan ka hrechhuak asin!!

 I hming pui ang chiah, Zorinsangi a ni a, Rinsangi tiin an ko ve thin tho. Hmanah intihhlum pawh a tum tawh asin, a kum ka hre mai ta lo. Tumkhat chu hna ka thawh mawlh mawlh lai chuan, a nau pakhat hian min rawn call a, “U Rinsangi intihhlum a tum” thaw hlawp hlawp in a rawn ti a. Tunhnai ah Zorinsangi hi ka hmu khat hle in ka hria. Thla 1 vel zet chu ka hmu tawh lovin ka hria. A rang thei ang berin ka tlan phei ve nghal a.

 Ni e, Rinsangi hi ka țhiannu ti a sawi mai tur chi a ni ang. Kan inhriat tirh hian bialpa a nei a, kei pawh in bialnu ka nei a. Ngaihzawng en in min en lova, kei pawhin en loh ka tum bawk a. Engemaw lai kha chuan in close viau mah ila, ngaihzawngte phatsan khawp in kan inkawm ngai lo. Kan inkawm tam em em lova, mahse kan inkawm hi chuan kan inpawh in, kan inngaina ve viau thin chuan ka hria. Langsar takin kan inkawm vak ngai lova. Midang phei chuan kan inkawmngeih rilru viau tih pawh an hrelo ang. Keia va tlan phei ve pawh, mi chuan hawkdak tlan ah min ngai ve mai ang a. Kei pawh chutiang deuh chuan, hawkdak tlan ah ka inngai ve tho. Ka nun thlak danglam vek tur ka tawng dawn tih reng ka hre bik lo.

 Ka va thleng a, hla deuh ațang chuan ka va hmu a. Rinsangi chu an inchung sir thei ang berah chuan a lo ding a. A awmdan leh chetzia atang chuan a chhungte a vau mai mai lo tih ka hrethiam nghal. A pa chuan vau chung hian, “Zorinsang, i pa lung i ti awi lo khawp mai, kan mualpho tam hma in rawn chhuk rawh” tiin a lo ko mawlh mawlh a. Mahse hre awm pawhin a lang lo.

 A nau te bulah chuan enge a chhan tih te ka zawt ve a. A bialpa in nupui a ruk avanga rilru hah intihhlum tum aniang te an ti a. Mahse a bialpa nen an ințhen tawhin an sawi bawk si a. Ni e, hmangaihna la na ve thei tak anih thu kha hmanah a sawi tawh a ni. Mahse mi invawng leh inthunun thei tak kha a ni țhin si a. Tun țum zet chu a tawrh zoh loh khawp engemaw tak a tuar a ni ve ngei ang. Thla 1 liam ta mai khan YMA Conference ah kan kal ho kha a ni a. Kan haw hnu khan hla ngaihthlak a atchilh thu leh tun hnai, Kar khat chhung chu chaw a ei tawh loh thu te, damdawi a hmuh ang ang a ei vak vak țhin thu te min hrilh a. A rilru pawh a pangngai zan tawh lova a hriat thu te a sawi bawk a.

 Tih theih nei vak in ka inhre lem lo, an chhungkaw in ko, in vau vel chu hlauthawng leh mak ti takin ka thlir ve a ni mai a. A nu chu a țap pur mai a. A chhungte chu an phili nasa hle mai a. Mi pawh an pung chak phian mai. An inchung sir ah chuan tla lek lek a ding chung hian a mah chuan a phun mawlh mawlh a. Hmun sang hlau viau thin leh thih chak lo ber pawla ka rin in chutiang rilru a pu ta mai chu, a rilru chu a na ve viau anih ka ring. Midang a bula an kal phei dawn chuan zuan thlak a tum zel avang leh, a ti mai mai lo nia a lan avang chuan tumah chuan an va pawh tha ngam lova. An koh lah chuan engmah hrelo ang hmiah in a en ngai a en reng si.

 Mi an tam avang a ka hmuh chian theih vak loh avang in, a nau te kar atang chuan ka va dak thui ve deuh a. Ka hmu chiang deuh chu ka phu zawk mai. Thla 1 chhung lekin a lo cher in a dawldang hman hle mai a. Chaw khamkhawp ei lo tih takah a hmel te chu a hriam hrak mai a. Tun thla ah ka la hmu miah lova, kan la inbe miah lo bawk a, a hmel ka hmu thut chu ka phu zawk thei a ni. Nula hmelțha leh hlim thei em em, hetianga an danglam ta thut chu mak tih loh chi a nilo. A vun ngo tak te chu a dang em em mai a ni.

 A nau chuan ka bulah chuan “U Siamte, U Rinsangi hian min ti hlauthawng e” a ti a. Chutia ka hming a lam rik chu Rinsangi chuan a hria a niang. A lo hawi phei zawk a, eye contact kan lo nei hman a. A rei lo nain, reilote min rawn melh a, kan in melh zawk chhung khan, ka ngaihbel pawh a ni maithei, engemaw ti tak hian a mitmeng chuan min ko ni tlat hian ka hre ringawt nia.

 A ti duh tak tak mai ang tih hlauthawng ve deuh a. U te kan nihna ang leh nau te cheia kan lo chei ve thin a ni bawk nen, a hmaa tumah melh si lova melh ngai melh rengin, ka awm tih a hriata a rawn hawi phei ve zawk takah chuan, ka huaisenna sawmkhawm in a chhungte au karah chuan “Rinsang.... la ti suh, nghak hret rawh” tiin ka va ko ve phut mai a. A chhungte koh pawha hrelo ang hmiaha awm si kha, ka koh ah chuan a rawn hawi phei ta anih chu! A mittui tling puau karah chuan a mit chu a tap nasa tih hriat tak hian a lo sen vek tawh a ni.

 A mitmeng beidawng taka min melh chuan engemawti takin huaisenna min pe tlat mai a, tih dan a awm tak mialin tiin ka pan hnai hret hret a. Chet pawh a tum lem lo, min en reng a, kei pawh in a mit ah tak melh chunga pan zelin, ka va man thut a, ka kuah chawt a, chiang takin min melh zawk a, chumi zawh chuan a mit chu chhingin, a zawi ta hnawk a. Ka pawm ta hle hle a, a chhungte rawn kal in, inah an zawn thla ta a ni. Mi an tam em avang leh bawr luih luih an duh loh ka rin avang chuan in lam ka pansan ta rih a.

 Kei hi Company hnuaiah project pawimawh tak thawkin ka awm a. Tuna ka thawh mekna khua ah hian kum 3 vel zet ka awm tawh a. Mi hriat pawh ka hlawhin, tualchhung mi ang maiin ka awm tawh a. Ka hnathawh nen a in rem loh em avangin nu leh pa te'n min chah viau mah se, Kohhran erawh ka bel em em lova. Khawtlang rawngbawlna, YMA lamah erawh ka hman hun apiang ah theih ang ang in ka tel ve țhin a. Tlangval mahnia parawl ngawt aiah, ei rawngbawl turin ka patea fanu leh a țhiannu thingtlang a mi ka awmpui a. Zirlai ve ve an la ni.

 In ka thlen veleh kan veng Aizawl a ka bialnu, Mawitei chu ka call a, ka chanchin te hrilh in, mi thi mai tur nunna ka chhanchhuah thu ka sawi chuan ti tha min ti ve hle a. Kei pawh chuan Rinsangi lam chu ngaihtuah chhunzawm lem lovin, a tuk lama hnathawh tur te ngaihtuah in chaw te ka ei a. Zanriah ei kham chuan tluk zal pahin whatsapp message check in phone ka khawih mai mai a. Phone call ka dawng leh a, Rinsangi nau bawk chuan “U Siamte, lo phei leh lawk, kan mamawh che...” a rawn ti leh a.

 Ka va thlen phei chuan Rinsangi chuan min rawn kuah nghal chawt mai a. A mitmeng chu a buai riau in ka hria a. Mumal pawhin a tawng chiah lo, hriat hleihtheih lohin eng engmaw ni a sawi bual bual a. Mi kuah chu a thlah duh hauh silo a, ka hamhaih hle a. A pa chuan, “I bulah chuan engmah zep angai lova, a rilru te hi a buai rih niin kan hria a, kan inthlahrung viau nain, min lo hrethiam dawn nia. Kan thunun hleithei tlat lova, engtin emaw a rilru i hneh theih takin kan rawn ko ngawt che a ni” a ti a. Reilote ah Pastor te pawh an rawn lut a, tawngtaina an hman lai chuan mi kuah chiah tawh lo mah se, ka banah mi vuan reng a. Mi thlah duh ta hauh lo mai.

 Zan dar 10 vel ah chuan haw ka tum ta a. Ka kalsan thei thei mai lo, mi man tlat bawk si, tawngkam pangngai in a biak tlak bawk silo a. A awmdan chu ka hrethiam lovin mak ka ti takzet a. A pa te chuan a chang leh an vau a, a chang leh an hau a, a chang leh naupang chhe thlem tak te in an thlem thin a. Mahse awmzia a nei chuang lo, min thlah duh tlat lo. A pa lungawi lo chuan tharum hmanga an han phih takah chuan a hnuk sawn thei ta a, mahse țap chunga min ban hram hram leh mitmeng khawngaihthlak tak avang chuan ka lainat ve ta riau a. Haw zai rel mai ta lo chuan ka awm leh ta rih a.

 Zan dar 12 dawn ah pawh kan la in kalsan thei chuang lova. Rinsangi te chhung nen hian kan in ti chhungkhat viau mai a. Mi pawh an ring viau a ni. A pa te bulah chuan, “Mi vawn a thlah duh silo a, rawn riah ngawt a inthlahrunawm sia, kan va haw pui ang a, zing lamah rawn dah phei ka lo tum leh mai dawn nia” ka ti a. A chhungte chu inthlahrung viau mahse tihngaihna an hre bik silo a. Ka nau te ka call a, a riahna tur te an lo siam fel a, Rinsangi chhungte chuan min thlah an tum viau nain, mi tina zawng leh mi ti thlabar zawng in a khawsa lem lo bawk a, keimahin haw pui ka tum ta a. Zan khat vel a awm chuan a zia mai kan beisei a ni.

 Ka haw pui ta a, ka bulah a tap chawt reng a. Zan kan mut dawn chuan a mu hrang duh ta reng reng lo mai a. Tihngaihna dang awm hek suh, ka khumah chuan muttir a, a meng kar mai a. "Muhil rawh le" tiin duat takin a chalah ka chul a, a muhil ve ta mai a. Ven ngaiin ka hre bawk nen, khum bul chhuat ah chuan țhu in, thil tamtak ngaihtuah pah chuan ka tlaivar ta zak a.

 A tuk ah pawh chuan a la zia lo nasa, nileng pawh chuan ka chhuahsan thei lo. Kan inawm nileng zak a ni mai a. A kawm tlak lem lova, a mitmeng a buai leh țhin a, mumal in engmah a sawi theilo bawk a. Mahse min mamawh miau avang leh, ka lo ngainat ruk ve țhin avang chuan, nin leh hah pawh sawi lovin ka buaipui nileng ta ringawt mai a ni.

 Tun hmaa kan lo inbiak ve zeuh zeuh emaw, min ngaihzawn ruk vang tih vel ai mah chuan a thi tur ka chhanchhuah avanga min ngaina ni berin ka hria a. A rilru na khan a thluak ah kim lohna a awm ang a, a engemaw berah min ngai niin ka hre ber. A hnu zela a awmdan ațang hian, a chang chuan pa angin min en a, a chang leh min pasal chei a, a chang leh U en in min en a, a chang chuan Pathian ah min ngai ni te in ka hre hial țhin.

 Hun te a liam zel a. Karkhat ngawt mai kan awmpui hnu chuan ka chhungte leh ka bialnu bulah pawh chuan engkim hrilhin, phone hmang te chuan engtia tih zel tur nge kan ngaihtuah nasa mai a. Rinsangi chhungte lahin rawn lak an tum thin a. Tihngaihna a awm loh bakah, mi ngaina em em tu, min kalsan hreh ngawih ngawih tu chu țawngkam ringawt a hawpui theih chi a nilo. Tihluihna a an lak kir ka phal chiah bik lo. An inthlahrung chuan a chawhmeh ang zawng te’n tan la in, chawhmeh te hi min pe reng mai a ni.

 Amah pawh a zia sawt viau in ka hria a. Amah in khum hrang ah a mu ve duh tawh a. Inthiar leh intihfai te chu tha takin engkim a ti thei vek a. A thawmhnaw te pawh fai takin a su mai a, ka thawmhnaw bik pawh a lo su fo țhin a. Ka nau te pahnih hi a ngaina vak lovin ka hria a. Ka nau te lah hian a tirah chuan an hlau deuh a, mahse ngaiah an nei ve vat mai a ni.

 Phone a khawih ngai lova, khawih thei chi ni pawhin a lang lo. A hming chuan a kawl ve a. TV ka en chuan a lo en ve a, in lama hna ka thawha, a thiam zawng anih chuan min pui melh melh zel a. Ka chhuah chuan, ka haw hun nghakin nilengin kawngkhar ah țhu in min lo nghak țhin a. Ka khawhar min hnem in, ina haw min ti phur tu ber a ni a. Ka hnathawh zawh ah pawh ka leng kawi ngai ta lo. In lamah nghakhlel taka min lo nghak tu an awm tih ka hriat chuan, haw vat vat min ti phur țhin a ni.

 Ka bialnu Mawitei pawh engkim ka hrilh avang chuan a hrethiam ve viau a. Thik en pawhin a rawn en meuhin ka hrelo. A chenpui te pawh chuan vohbik chei pawhin kan chei meuh lo. Naupang chhe enkawl takin kan enkawl a. A hmasawn dan en chuan, thla 1 hnu vel chuan a zia mai ka ring a ni.

 A rilru buaina remchang ah la a, nulat tlangval zawnga khawih ka tum ngai lova. A duh pawh ka duh bawk lova. Room khat ah awm mah ila, kan zahawmna ti bawrhbang zawngin tumah kan khawsa lova. Amah pawh zahawm takin a awm țhin a ni.

 Mahse mi hi a ngai em em reng a. Ka hnathawk bang te hi min lo hmuah te hian, eitur emaw a lawmzawng hawn hi a lo beisei ve reng thin a. Ka bulah chuan a pangchang em em mai a. A chang chuan eitur ka barh kher te hi a ngen tlat țhin a, ten chhe ve viaua ka hriat țhin nen, kut lawngin chaw te kan in barh țhin a. A uan a chhuah chuan na lo te hian ka kut ah te min sehsak țhin a. Ka hlimpui thei hle țhin a ni.

 Mahse intihhlum a tum ni atang khan mumalin engmah a la sawi leh rih lo a. Ina ka awm lai hi chuan kan in zui chawt a ni mai a, amah avang chuan khawtlang ah pawh ka inhmang thei ta meuh lo, nau awm takin kan inawm reng a ni ber a. Ka bulah, min si reng leh ngawi reng hian a thu melh melh reng mai thin a. Hna berah ka nei a ni ta ber mai. Ka chhuak dun ta fova, mumal takin thil a sawi lem lo tih loh chu, rilru buai a ni tih pawh rin a har viau ang.

 Kar 2 vel hnu vel chuan, eitur ka hawn sak nasa bawk a, thil a ei țha bawk nen, a taksa pawh a chak in, a vun dang em em pawh ti sen in a rawn pawlh leh tawh a. Engmaw chang hi chuan a mitmeng te hi a fiah felfai viau hian ka hria a. Mahse chutiang zawng deuha ka en nia a hriat chuan a nuar leh ringawt zel a, naute thlem takin thlem a ngai țhin a. Ka thlem hma loh chuan a nuar bang duh lo țhin.

 Ka rin ai takin ka hlimpui a, amah pawh a hlim ve viau țhinin ka hria a. A dam vat vat ka duh rualin, a dam fel ang a, min chhuahsan daih te ka hlau rilru ta viau mai a. Rilru chhia put chang chuan dam vat lo se te ka ti rilru hial țhin. A chhungte rawn ngaihven țhin pawh, an lo kal ngun ka ti deuh aniang "Lo tlawh vak duh suh u, a zia hunah ka lo hruai mai ang, heta a awm deuh a la țha ang" te ka lo ti mai țhin.

 Thla khat aia tam mah nui ngai tawh lo kha, thinlung takin ka bulah a nui leh thei tawh a. A hlim hmel chuan hahdamna min pe țhin a. Ka hnathawk haw, nui sang chunga min lo hmuak ka hmuh chuan ka hahdam sawng sawng zel a ni. Ka bulah a thlamuang a, a bulah ka hlim bawk a. Pathian in amah enkawl tur hian min dah anih ka ring rum rum a. Inkhawm tam lo mah ila, engkim hi Pathian ruat tih ah hian ka in nghat ve fo țhin a ni.

 Karhnih zen zawn hnu, nikhat ka hna kal chu, Rinsangi lawm zawng nia ka hriat ei tur chi hrang hrang keng bawr teuh chung chuan kan haw a. Mahse nidanga kawngka a min lo hmuaka, min lo thlir reng thintu chu a awm ta hauh lo mai. Ka nau te pahnih chuan min lo melh hrek hrek a. Lungawi vak lo chung chuan khawnge a awm ka zawt a. A chhungte’n a duh lo chung an rawn hruai tak thu an sawi ta a.

 “Engatinge min rawn miah lova an kalpui” kan ti ringawt a. Ni e, ka rin leh beisei ai daihin ka lo ngaina hle tawh a ni a. Ka bing deuh mup mup in ka hria a. An in lamah ka tlan phei nghal a, a nau a lo awm a. Phai lamah Home ah dah an tum tih bak a sawi thei silo a. Rinsangi chhungte inthlahrung leh mangang chuan ka ngaina ve deuh tih an hria a. Nula tlangval inbuaipui reng a mawi lo an ti nen, ka nu leh pa te lo han hrilhin, ka hnathawh hlan in an lo hruai daih a lo ni a. Ka awm chuan hruai ka phal dawn lo tih an hria a ni ngei ang.

 Chumi zan chuan thla chu a eng dumpawl nalh hle mai a. Zan mut hnu chuan ka muhil thei lo chu ka tal ka tal a, ka tho leh țhin a. Pawnah chhuakin thla eng te chu ka thlir vung vung a, ka naute Rinsangi kha ka ngai a ni ber mai. Mi pangngai pha hrih lo mah se, nula a ni a. A hmel a tha in a nungchang pawh a tha em em thin a. Mahse bialnu nghet ka nei a, rilru kim lo nula, lo buaipui a, han muthilh theih loh phah ngawt zawng a fello e, tiin mut ka tum thin a. Mahse ka muhil thei mai lo.

 Ka rilru chuan thil tamtak a chhui a, ngaihtuah loh ka tum țhin a. Mahse ka tel lova a awm tur chu ka ngaihtuahna ah a lo lut leh țhin a ni. Keimah anga hrethiam tu a nei awm silo. Ka bula a pangchan angin midang bulah a pangchang thei awm silo. Ka taksa si reng, ngheng reng khan ka rilru thlengin a lo luah tawh viau a ni. Ka chhing sek a,ka mangphan a, huan zau pui ah hian amah in a lo tei ruk ruk a, ka hminga min ko in mangang tak hian min lo zawng nasa mai a. Kei lah chu ka tawng theih loh bakah ka kal thei der silo a. Ka tal vaka, ka harh zawk a, thlan tuiin min lo bual huh zuih mai a ni.

 A tukah chuan ka nau te pahnih bulah chuan sawiin, ka zin san dawn tih ka hrilh a. Ka nu leh pa bulah chuan Zorinsangi awmna hmun leh an enkawl dan tur te ka chian ve phawt duh ka ti a. Kan bialnu Mawitei pawh engkim ka hrilh a, a tirah chuan a hriatthiam loh hmel hle mai a. Ka mawhphurhna ah ka ngai tlat tawh a. A hahdam tih ka hriat loh chuan ka thlahthlam dawn lo ka tih tlat avang leh, ka tum tawh chu ka tum lui țhin tih hrechiang tu a ni bawk nen, phal em em lo mahse mi hnial ngam ta chiah lo.

 Phone in kan Company hotute bulah harsatna ka neih avangin tiam chin nei lova chawlh ka ngaih thu ka report a. Engkim huam in zing chaw eikham chuan amah zawng tur in, ka hmuh hma chu haw tawh lo turin in atang chuan ka inkhalhchhuak ta a.

(peih huna chhunzawm leh tur)