SAI SUAL AN NI EM?

Sai in a neitupa, a enkawltu pa te emaw an han beih hian Sai sual kan ti mai ṭhin.

Sai hi ramsa ṭhen zingah ramhnuai a cheng chi a dah a ni (wild animal). India ram hi sai vulh nasat na hmun anih avang hian, mihring bula khawsa chi, vulh chi (domestic animal) ang ah tamtak hian kan ngai deuh em aw ka ti ṭhin.

Sai te mai bakah ramsa tamtak (wild animals) hi chu, mihring hian vulh tum lem lo ila, ramhnuai ah zalen deuh in khawsa se a ṭha ber in ka hria. Mihringin an vulh ka hmuh hian hmuhnawm ka tih rualin ka khawngaih ṭhin.

Ramhnuai ramsa reng reng chu an pianpui nunphung (Pathian siam dan) avang hian, vulh fing ve fe a ngaih tawh pawh hi, buaithlakna chin a awm leh fo ṭhin niin a vulh tu tamtak te hian an sawi bawk.

Sai hi wild animal anih miau avang hian ramhnuai aṭangin mihring rawn bei ringawt nise chu sai sual a ni thei ang a, a vulh tu te an bei leh zeuh ṭhin erawh hi chu ramsa an nihna ah a awm ve tho tihna chen ka nei.

USA a Ui fing ni tura an zirtir lai ka hmu tawh a. A takah la hmu lo mah ila, ui fing tak neih aiin ui mawl neih hi a ui a te kan duat zawk anih mah dawn hi ka ti rilru. Ka lo khawngaih thei.

Sai pawh hi an pu te thu an awih em em hi chuan an hrem ngun viau tawh tihna a nia. Nasa taka hna an thawh tir, thing lian deuh hnuk pakhat (youtube) a ka hmuh kha chu a hah khawp mai. An vaw tel bawk a, a mittui te kha a tla thei mawle...

Vawikhat chu Saikhawthlir bul ramhnuai ah khuan Sai note hi an lo train mek aniang. A pui kha an thlung a, a chhan thei bawk silo a, mihring ang tho in, rilru la puitling lo sai note lah kha a fing viau silo a, vai naupang in an hlap tak tak mai a. A vaw nasa sia, a ankhum nasa bawk sia, sai note khan a hlau sia, a hram dan aṭang khan a ṭap ve in ka hria. Khatia a tet te aṭanga an thunun loh chuan a len hnuah an thuhnuaiah an dah thei dawn silo a. Khatia training pek thlap a, sawizawi kha an tih dan anih hmel sia, kan hmuh lai chhung pawh khan an va han hrem nasa tak!

Kan awmna aṭang khan kan hmu thei a, mahse a hla ang reng a. Lung te khan kan vawm a, kan zuk au chiam bawk a. Zin mek kan nih vang khan kan kalsan leh a.

Khata ṭang khan sai hian an pu te an chil hlum zeuh pawh hian a pawi ka tih viau rual hian, kha sai sual vang ngawr ngawr kha a ni ang em? Engtianga rilru na nge a lo tawrh ve tawh ang tih hi ka ngaihtuah na ah a lo luh ve phah ziah.

KA SUMO CHUANG

Aliana Sumo ah chuan ka tum a. Driver ka be lawk a, seat min lo dah ngei ngei rawh aw ka tia, ngaih ṭha deuh in ka mu ta a.

A tuk ah Zarkawt Traffic Point chhak, Mamit Sumo dinkhawm na ah, Mamit lam pan tum in ka va kal a, driver in min han hmu thut chu (h) 

"E he, seat ka dah theihnghilh daih che" 

"Chu ka haw thei dawn lo a mi? A va ho awm ve"

"Tih dan kan ngaihtuah dawn nia, lo nghak phawt rawh"

Bungrua a rem ṭha mawlh mawlh a, Silpaulin pawl in a tuam a, hrui in a kaih nghet a, a sumo a chuang tur te, tlem lo ṭhu lawk sa bakah, ticket la leh driver in seat a hauh sak ho te an lut sang sang a. An luh kim meuh chuan an khat vek. Naupawm pakhat a awm in ka hria, Driver nen 12 vel lai chu an ni in ka hria, an full khawp mai, chuanna tur hmun awl ka nei ve lo.

Chuanna chang ve ta lo chu, haw leh mai ka tum a. Ka bag nena ka ding ran chu driver in min khawngaih deuh aniang, lo lut ve rawh, in hnawh deuh ila, khutah lei tlahniam (Hunthar) velah inrem ṭhat dan kan ngaihtuah dawn nia a tia. Ka inthlahrung viau nain, Mamit ah haw ngei ngei ka ngai si a, ka lut ve ta rawih a.

YMA Seat No. 3 a chuang a chhuk a, a hnung ber lane ah min luh tlang tir a. Dinglam 2 ah patling an ṭhu a, veilam ber, tukverh bulah nu pakhat ṭhu in, a bul chiah ah hian an pa a ṭhu a. Hetih lai hian hemi te nupa nen hian kan la in hre em em lo. An lian hlawm angreng sia, 5 a inhnawh theih si lova. Ṭhutna tur awl awm ta lo chu, driver khan, Hlutea kha lo pawm deuh mai teh u a tia. Nupa a an pa ber chuan min pawm ta anih chu! Tlangval a pumpa, patling hmelhriat vak lovin min han pawm ut mai chu, a va nuam lo tak, ka ṭhu sang bik sia, a chung ka tawng loh nan ka kun ve deuh nen, posi a lai in, chuan nuam tak a nilo. Ka ngawi kar a, ka ṭang ṭeuh mai.

Driver khan a rawn thlir ve a, a rem teh ṭeuh lo tih a hrethiam ve aniang. Chanmari West lam panthlak na ah, kual kawi laia Edenthar panthlakna (niin ka hria) tah khan min chhuk tir a. Ke in lo zuk kal la, Hunthar lei tlahniam ah khan kan in lam thla leh mai dawn nia atia. Ka bag nen, ke in kan kal ta bik anih kha, kea kal ralah chuan kal chhung a lo rei nek a, hunthar lei tlahniam ah mahni in rei fe ka tei rek rek a, sumo lah a rawn lang thei der lo mai a.

Motor tlan zut zut karah ka ṭhianpa te an rawn tlan hlauh mai a. Min phurh an tum a, sumo in min rawn lam dawn asin, te kan la ti ngial a, mahse an thawl sia, ka chuang ta tho a. Mamit kan thlen hnu ah sumo driver bulah thupha ka va chawi a, a rem em a, taxi in ka chhuk ta mai anih kha, ka va ti dek dek a. "E, a va tih zia ve, ka lo hre tawh reng reng hleinem" a lo ti et mai.

Vawiin chu ka hrechhuak zawk. Zarkawt a in rem leng lo kha, Hunthar lei tlahniam ah in rem len ngawt theih a ni miah lo tih te ka hrechhuak a. Driver khan phur duh lo anga lan hlau si (min phur duh lo anga ka ngaih chuan next ah sumo dang hlir ah ka chuang tawh dawn sia). Passenger nghet chan hlau bawk si, midang hrehawm taka an chuan ai chuan tiin thiam taka mi thlauhthlak dan a ngaihtuah a ni tih te ka hrethiam ve ta deuh.

Mahse Zarkawt aṭanga min phur chhuak ve te te a, sumo chuang tur ni si, kea bag nen min lo zuk kal tir bik (anga lang), kea ka kal hlana tlan tlang daih a tum tih ka hriatchhuah hnu hian, hmu leh ila chu ka chhuahchhal hrim hrim ang 😀

Ka va lo khawngaih thlak tak 😀

FUTSAL TOURNAMENT AH

Kum 2019 a ni a. Mamit District huap Futsal Tournament a awm dawn a. Kan office kha Pu ber hovin kan sawi hot chho a. A tawpah Office hminga chhuah ve kha kan ti tlu ta a. Pu ber kha Coach cum player ang in kan ziak lut a. Keini a nau te ho, khel duh zawng kha chu player angin kan inziak lut ve hlawm bawk a.

Chhuah dawn rau rau chuan, District huap tournament a ni bawk nen, players tlem a zawng kan lak belh a. Kei kha a sawi a sawi lamah, sawi tam pawl leh sawi tlawr ve thei deuh ka nih ve avang khan, Coach pawh khan (la hre hek lo) pangngai ve viau turah khan min dah a, 1st match a lut tur 5 zingah pawh ka tel ve ran mai. A hrim hrim in kan players lak ṭhenkhat leh keini ho en khan 'tui kan heh dawn' tih kha chu a hriat sa reng mai.

Tournament ṭan zan a ni a. Kan team a player dang te kha chu an Jersey number a pangngai a. Kei kha chu Jersey No. 99 ka ha ṭat a. (AC Milan Ronaldo ka entawn) forward ah, pet goal tura awm tur ka nih chu. Kan in line a, Official te khan ka Jersey Number kha an complaint nghal a, khami ṭuma Futsal dan an hman khan hetiang Jersey Number tam deuh kha a lo phal lo a lo nia, mahse a dang print na tur hun a awm lova, inkhel tura in line tawh kan ni bawk nen, Official zinga mi Maliana te khan, 'A ho lutuk, Hlutea chuan a duh duh number ha mai mai rawh se' te kha a rawn ti vel a, ka va thiam loh hmel tak.

Tichuan Captain ah ka la awm zui a. Kan thah (kick-off) dawn a a hmasa ber ah ka ding ang veng vawng a, kan team player zingah kha chuan fans ka nei ve nual aniang, mipui lam aṭangin ka jersey number leh ka hming te an rawn lam ve nak nak mai. Intum tur team hnih te kan in ring a, whistle an rawn ham ri tuar(h) a, Ka start dawn chiah a, a pawi lutuk, ball kan thai ṭhelh palh hlauh anih kha. An nui nghal hluah hluah mai. Ka thai ṭha leh a, ka thai fuh ta.

Tichuan, reilote ah ka hah vang em em pawh nilo, ka thiam loh vang zawk in min rawn thlak thuai a. Kan players lak te ah khan ṭang ve thei deuh deuh, zia ve tak tak te an lo awm nual a, va luh ve leh pawh kha a inthlahrunawm tial tial mai. 'Va lut leh la' an tih ṭawngkam ṭhat pawh khan, lion in pah in ka nui tut tut ringawt.

Match zawh ah chak lo chungin Office lamah lut khawm in, review na leh next match atana pawimawh te kan sawi ho a. Kan Coach pawh a ṭang deuh aniang, "Kan chhuak ve ta rau rau, Hlutea lut tawh lo se, pangngai deuh hlekin khel ve tawh ang u" an ti ngei a 😅

A tuk aṭangin futsal boot tel lovin, kan tlak thleng in Asst. Coach angreng deuh in ka awm zui ta law law anih kha.

3 IDIOT???

Kum 2025 a ni a. Rorel Inkhawmpui in Lengte ah kan kal a

Lengte khua kha a lum hle a.

Thlen in 1, an mikhual te inhnuaia riah tir, lei chhuat ringa siam room a riak te 3 - Lalthana, Rinchhana leh Hlutea te khan lum an ti zual ṭhin in a hriat. 'An thau/dulkiar vang anih chu' te in ti maithei. Mahse a nilo ania.

An riahna room ah tukverh 3 a intlar a. Tukverh hawn vek loh chuan boruak luhna tur dang a awm loh avangin a lum/uap hle ṭhin a ni.

Zirtawp zan a ni a. Lalthana tel lovin, tukverh 3 hawng in Rinchhana leh Hlutea te 2 an mu ta a. Pu Rinchhana a muhil nghal suk suk a. Pu Hlutea muhil theilo chuan an ke zawn lama tukverh 3 chu a en ṭhin a. Pawn lam a thim vek si a. Dum deuh, sam thur bim bem, tukverhah khan a rawn dah thut duh hmel tih vel a ngaihtuah a ngaihtuah a. 'Thlahrang hlau rual ka nilo' tia inhnem in, khar phah nan hman a tum chuang lova, mahse rul pawh a rawn tleng lut thei tih a ngaihtuah leh a, chu chu tukverh khar chhan atan a tling tawk ta hlauh mai a, zanrei lutuk tawh ah a va khar ta vek a ni.

Inrinni zan a ni leh a, Pu Lalthana a mutbu nen a rawn in pawm lut ve ta a. A hma zana tukverh khar vel kha chu engmah sawi chhunzawm a awm lova. Zan mut a hun a, a lum em avangin tukverh khara mut chi a ni mang silo a. Tukverh hawng in an mu leh ta ṭham a. Pu Hlutea leh Pu Rinchhana an muhil a. Pu Lalthana chuan a zan hmasa a Pu Hlutea ngaihtuahna hmasa zawk ang kha ngaihtuah ve leh in tukverh 3 te chu a lo va khar veleh ta a ni.

Pathianni zan a ni leh a. Pu Rinchhana tukverh khar zan tur a ni ve ta a. Mahse a zan hmasa a khar te'n an khawngaih avangin, zanreia a thawh ngai lo turin mut hmaa 'khar law law' an ti ta a ni. An han khar law law chu an lum khawp mai.