MARBLE 10 INCHUH

Naupangin kawngpui a ball an pet ka hmuh hian kan naupan lai, kan inkhelh ve thin lai ka hrechhuak ve fo thin. Kum 10 lai a lo liam ve ta, kan naupan lai a kawngpui a ball pet a kan inkhelh thin lai te kha aw… A thiam pawl chu ka ni hauhlo, mahse a phakar thiam leh tawng pawng inhnial ah tuman min tluk loh avang khan ka team te ka chakpui ve fo thin. Kawngpui char a indaikhah tluk leh ball hlawi thelh tum te khan kan vunchhia kha an khawk hlawk mai a. A sen tiam tiam a, a rei deuh a, a lo belkang a, a dum leh a. Kan han khawk leh a, a sen no raih thin…hehe…

Tumkhat chu marble 10 kan inchuh alawm le. A phanchang deuh pahnih Ka U Chhuana leh Nghahmawia te’n Lalthlamuana lungte hum in rindik siak in an team tur an thlang a. Nghahmawia, Lalthlamuana, Haaia, Biaka leh kei te kan tang hova. Lehlamah Chhuana, Hriatsanga, Rinchhana leh Laltanpuia te an tang bawk a. Anni lam pakhat a an tlem bik chhan chu Chhuana len bik vang a ni. A hmasa ber atan Goal tur kan siam phawt a, a zau zawng chu Chhuana kal pangngai pen thum leh hniak hnih a ni a. Goal ban atan Ita bung leh Haaia Bata Silipar hrui chanve awm kan hmang a. Leh lam Goal banah Nghahmawia vai chapal leh Biaka lung denhuai kan hmang bawk. Goal ban (sikham) a awm hran lo. A chung sang deuh a kal, a goal leh goal loh chu inhnial chak zawk zawk thu a ni mai tih chu sawilawk ngai lova thu awmsa a ni. Heti lamah chuan ka awm ve avangin kan lungphang hranlo.

A lai hawl vel a kan ngaih atang chuan kan en vang vang a, a lai tak a kan rinah kan rin tawp a, chu chu centre ah kan hmang a. Dan leh hrai engmah kan zam lo, FIFA dan hmang lovin a tawng chak deuh sawi ang ang chu kan dan a ni mai a. Offside tih vel chu kan la hre ngailo hrim hrim a. Motor a rawn tlan chuan ‘ball-stop’ a ni mai a. Ball inchuh nasat luat vang a ball a thep hlauh chuan ‘la-hai’ tih pah a ham puar zuai a ni leh mai a. Half-time a tan Si nga a ni a, Full-time a tan Si sawm khung hmasa zawk zawk a ni mai a. Chu chu chak zawk tihna a ni ang. Players zing a tu emaw ber an chhungte’n chaw ei tur a an rawn koh hlauh chuan BENALTREE (Penalty) a chak zawk zawn tur a ni. Jersey atan kawr ha leh halo a ni leh mai a. Tile chhia lehlam chil chhak kan vawr a, kawr phelh pawl ah kan tel a. Rifirit (referee) pawh an awm hranlo a. Engemaw a awm chuan inhnial luai luai a ni mai.

Nghakbawiha’n ngalkawr (shinguard) khing lehlam a rawn bun chhuak a. Midang zawng chuan kan bun ve lo a. Ke lawng a khelh a ni mai a. Kan pawl chuan tactic (game plan) tha deuh kan nei a, Nghahmawia chu lehlam goal bulah a awm char char ang tih a ni tawp mai a. Chuti chuan pet goal kan awlsam deuh kan ring a ni. Lehlam pawl chuan eng game plan nge an neih kan hre hranlo. Chhuana’n an lam pawl players te a hrilhru diat diat a. Chuzawng chu a ni mai. Lalthlamuana’n kut chang an tum raih mai a. Game ropui kan tan ta.

Hriatsanga’n ball an khawih chiah a, kan tlankhawm nghal luih mai a. Kawngpui laiah ball leh ngal kan han inpet sak tak tak mai a. “aiah, aiah, ka ngalah min pet” tih vel a rik luih luih karah ball a rawn thlawk chhuak nawlh a. Laltanpuia a lo tap der tawh a, kan han chawl lailawk det a. Upa ber nih manah Chhuana’n Nghahmawia chu Yellow Card i hmu an ti ngawt a. Nghahmawia lah dang duh bik heklo, lehlam pawl ho chu a ngal pet hmasa ah an put vek phawt te te a, a kekawr a hlim a. A lo him piak si a, um…. Yellow card pakhat kan nei ta phawt.

Kan khel chhoh chhunzawm zel a, rinai takin kan fair fu nain Rinchhana’n kan lamah a pet goal dawn tlat. Kalvat (culvert) khuar lamah a khalh lut a, ball luh laiin ‘out lo’ an ti zauh mai a. A out loh chuan an pet goal ka hlau si, “A out, tan hma khan ka sawi daih tawh Haaia pawn a a hria ang”

Haaia chu kan han zawt sap sap a, kan zawt ve a “Haai, kalvat a pet luh hi a out ka ti tiraw”

Velh a hlau sia “Aw” a lo ti dui a.

Darkar khat vel zet kan khel ta. Si kua leh Si kua in kan in draw mek a. A pet goal zawk zawk chak a ni tawh dawn si a. Disaiding-in (deciding) in khel ila, si sawmpakhat gem ti mai ang u ti a rawtna awm te pawh kan hnawl zel a. Hriatsanga’n a rawn khalh fal tlat, kan Goalie chhuanvawr Biaktea chiah a hmaah a awm tawh si! Pawh thluk ka tum a, ka pawh thelh si, a man dawnlo tih chu tlaiah ni a tla thin tih ang khawp a chiang a ni si a. Goal lamah ka tlan phei a, ball kan man chat mai a, penalty kan chawi ta. An pet dawn a, goalie kan inthlak chuk chuk a, ka ding ta ran mai a. Kan Captain Nghahmawia chuan min rawn hrilhru a “Ding lamah dive tum ang deuhin i awm ang a, vei lamah a rawn pet ang a, vei lamah i dive dawn nia” tiin min han hrilhru hmasa te te a. A fair nan Goal banah a dawih dawih pahnih, Laltanpuia leh Haaia te kan han dintir leh te te a. An thiampuipa Rinchhana a rawn pen chhuak a. An pet pawp a, Biaktea Goal bulah a lo tawngtai bawk a. Ka dive em ka hrelo, mahse bête hel rim a nam ram ram tih chu ka hria a, ka hmaiah tak min pet per a. Ka save a lo ni.

Penalty pet hma zawng a sawisel silo, a’n goal loh takah chuan an han inhnial leh hnuhnawh deuh laih laih hlawm a. “A goal dawn a lo man hrim hrim kha a fairlo, red card tur" “Penalty pet dawn veleh Goalie in inthlak” Kan Goal ban pakhat zawk, kan lam pawl a mi Haaia chu chhung lam ah a ding awn lutuk te an ti a. Phakar chhuahin kan goal bul a an inhnial laiin mahni in an goal lamah ka lo va pet goal ta daih mai a. Kan inhnial luai luai a. Tanna bul fuk leh thupui fel fek fawk nilo, tawng pawng inhnial te chu ka thiam zawng tak a lo ni sia. Kan chak phah ta… Marble 10 nen…tren tren tebul lem…..