TLAIBERH

Kan khua hi zo veh vawh, ramngaw durpui mai hmun a ni a. Khaw lian leh zau, mi chi hrang hrang chenna hmun a ni. He hmunah hian keini hnam hi engtik atang a lo cheng tan ve nge kan nih tih chu ka chhut pha hauh lova. Kan historian te paw’n chiang tak chuan sawi ngamlo mahse kum za tamtak chhung chu he hmunah hian kan lo awm ve tawh niin an sawi. Keini chhungkaw thlah chhawng te pawh nuam ti tak leh ngaihngam takin kan lo cheng thin a ni.

Engtik kumah nge ka pian ka hrelo a. Ka pian hmain ka pi leh pu te hian min boralsan a. Ka pa ka hre bawk lova, sawn an tih ang hi ka nih ber chu. Ka la hriat reng chu naupangte ka nih lai a ka nuin min boralsan ni kha a ni. Ka nu ramkal chu hliampui tuarin a rawn haw a, ramhnuai pilrilah ramsa kawlh in a lo bei a lo ni a. Mangang tak a inkuah a mual mi’n liamsan ni a ka khawhar zia kha aw… fahrah mai, belh tur neilo in he khawvelah hian ka lo vakvai ta a. Mahniin nun bul ka tan thar a. Ka theih ang ang a ka hrawk chawm theihna tur ngaihtuahin khawhar takin hna ka thawk ve thin a ni.

Hun a lo kal zel a, khuanu zarah lei rem ka rap chho ve a, ka nun pawh a hlim chho ve viau mai a. Kan tleirawl chho chu zep lovah chuan ka hmel a that bakah ka pian a nalh bawk a, min ngaizawngtu leh min duh tu pawh ka tawng chho nual a. Mahni mai a awm a khawhar thlak avangin leh thiante’n min tur nasat avangin pasal te ka nei chho ve ta a. Fapa pakhat kan nei a, kan pa nen chuan kan hlim dun em em thin a, tumah dang hi kan ngai biklo a ni.

Kan khua hi a ralmuang em em mai a. Kan khaw thenawm lawk lawk te chu misual rualin bei thin mahse keini khua tak hi chu min bei ngailo. Hetia thlamuang tak a kan awm lai hian tumkhat chu misual rual in  min rawn run ta thut mai a. Keini ralmuang thang tih takah han beilet thei ziazang kan ni silo a. Ralhrat leh kaihruaitu tha neilo ta chu min rawn sawp nek mai a. Kan mi leh sa tamtak boral zingah chuan kan pa pawh chu a vanduai zingah a tel palh hlauh mai a. Nupa tang then zet zawng, a tawn a tawn loh chuan a nat zia han sawifiah thiam chi a nilo. Ka thian te, hmelhriat te tamtak an thi a. Kan khua chu lusun avangin kan ngui nghuai mai a ni.

Kei ngei pawh chuan khawhar takin ka nun ka hmang chho ta a, fa ka neih ve avang chuan ka fa chuan ka nun khawhar lutuk tur pawh chu min hnem viau bakah chakna nasa tak mai min pe bawk a ni. Heng misual rual hian min zuam laklawh tawh avangin an nawm an makin a khat tawkin min rawn run chhen mai si a. Kan mi leh sa te tamtakin nun an chan tawh a. Hreawm kan ruar tlawk tlawk mai thin a ni. Engemaw chang chuan kan vanduai bik zia te ngaihtuahin Pathian pawh ka dem lek lek thin. Eng pawi nge kan sawi a, hmelma te’n heti tak mai a min tihchhiat an tum tak mai le. Zalen tak a kha leh chen kan lo awm tawhna kha engatinge tihchhiat an tum tak tlat mai.. Hmun hrang hrang ah mi hrang hrang zalen tak a an cheng tih ka hriat phei chuan kan zalenna ni tur thlirin ka hnuk a ulh teuh zel a ni.

Nikhat chu ka nun tawpna ni a rawn thleng dawn tih hre reng reng lovin eitur dapin ka vak chhuak a. Tlai dar 3 vel a ni tawh awm e. Ka fapa riltam chaw ka barh dawn lai chuan ka thlang lawkah chuan misual rual hi an lo lang leh thut mai a. Ka fapa riltam tap chu ngawi turin ka zap nghal a. Bihruk ka tum lai chuan min lo hmu hman tlat mai. An zinga hmelchhe ber mai, nunrawng leh rothap hmel ber chuan ‘khi le…’ chhuah tawh hauh lo ang u tiin a silai chuan min rawn tin a. Tlanchhiat ka tum lai tak chuan a silai chu a puak thawr a, ka khup bawrah tak mai chuan a rawn thip vawt zawk a, ka ke a zawi nghal vek a. Ka khup ruh chu a sawp tih ka hria a, engtikah mah ka kal leh tawh ngai dawnlo a ni tih chu hriat sa a ni a. Ka te thawt a, ka fapa mangang chu a lo chiau chul mai a ni.

Silai a rawn ri leh dawp a. Ka leng dawrh a, ka mit nghal sulh mai a, ka fapa ka neih chhun liau liau, ka hmangaih em em mai chu harsa ti takin ka ban tawk tawk mai a, ani pawh chuan tap hawm hawm chung chuan min rawn ban tawk tawk mai a. Ka tellovin engtin nge a nun chhoh ang. An man ang a, tihduhdahna tinreng tuarin a damchhungin zalen ni a nei tawh dawn silo. A innghahna leh a thlamuanpui ber in engmah ka tihsak thei silo, engtikah mah in hmu leh tawh lo turin ka kalsan dawn ta…a va na em!!!

Tiin chu TLAIBERH (sava) thi tur chuan ka thinlung chhungah thu a sawi a ni.