CANCER leh HMANGAIHNA

Enge hmangaihna leh Cancer-in inzawmna an neih? Enge an inlaichinna? Han ngaihtuah chian chuan inanna tamtak an lo nei ve reng mai.

Hmangaihna bul tanna chu lamkhuang buk hnuai emaw five star hotel emaw a ni thei. Chul ram thlamah a ni thei a, Cadillac car chhungah a ni thei. Zan thla eng hnuai a sertawk kung hnuaiah a ni thei a, Los Angeles Beach-ah a ni thei. Tuikuk refugee camp bulah a ni thei a, nuamtawlna khualzin lawnglian ah a ni thei a ni. Hetiang bawk hian cancer pawh a intanna chu hote emaw pui tak a ni thei a. Zuk leh hmuam lam, meizial, kuhva, sahdah, tuibur te a ni thei a thildang vang pawh a ni thei a ni. Duh reng vang a hmangaihna hmu (ngaihzawng zawn vang) an awmlaiin tawn palh/fuh avangin a hmangaihna a lo piang thei a. Inthlahdah avangin cancer a vei theih a, vanduaina avang liau liau in cancer a vei theih bawk a ni

A bul tanna a ho emaw ho lo emaw, hmangaihna a lo pianchhuah emaw cancer a lo lanchhuah chiah chuan tupawh ni ila, engpawh ni ila, khawiah pawh awm ila, eng thil pawh ti ila rilru pumpui mai hi a luah nghal ngut ngut mai a, lairil a fan a, thluak a vih a, thinlung a chhun thin a ni. Chu chuan taksa a hruai a. Huaisen avang a ngaihthah chi a nilo a, dawihzep avang a namnul theih lah a ni heklo. Lal em avang a enkhum theih a ni lo a, lal loh avang a kalkhum theih lah a ni heklo. Fin avanga hnualsuat chi a ni lo a, mawl avang a ngaihsak loh chi lah a ni heklo. Hausak vang a hnuaichhiah chi a ni lo a, retheih avang a pawmzam chi lah a ni heklo. Kan tawng theiin kan ta a ni thei ve ve a ni.

He taksa leh rilru zawng zawng min hruai avang hian thil tamtak a thlen phah thin a. Thil lawmawm min hmuhtir thei ve ve tu a ni. Cancer avangin Lal Isua la neilo te’n chhandamtu an hmuh phah thei a. Hmangaihna avangin a thenin nupui pasal an hmuh phah thei bawk a. Kal ngai lohna ah min kaltir thei ve ve bawk a ni. He Cancer avang hian thenkhatin Damdawiin an luh zin phah thei a. Hmangaihna avang hian thenkhatin hmangaihte inah an luh zin phah thei a. A turtu, pawttu, hiptu, loh theihloh a awm tlat a ni. Nun beidawnna min thlen theitu hian nun hlimna min temtir thei a. Beidawnna khuarkhurum a min tlak tir theitu hian tlang thawvengah min lawntir thei bawk a ni.

A bul tanna te, a kalkawng te chu engpawh lo nise a tawp khar dan hi chu tu tan mah han ngaihthah theih rual a ni lo. Hmangaihna lipui a cheng tawh te leh cancer vei tawh te chu he thil hian an nun a ei tlat tawh a. Hmangaihna lipui suarchhia in a len bo emaw cancer avang a vanduai in lei thuahthip hnuaiah chham ang an zal a ni thei a. Hmangaihna lipui an hleuh kai a emaw an cancer a dam leh pawh nise he thil hian an damchhungin serh bul a mei angin a zui tawh thin a ni.