MAIPAWL

Nipui khawlum huam huam hnuaiah ah chuan em rit tak phur chung chuan ka kal ve tauh tauh a. Ka thahrui neih zawng zawng chu ka hmang tak meuh meuh a. Ka thluak chuan kal a ngai tih a hria a, ka taksa peng tin mai chu thu a pek angin theihtawp an chhuah tak meuh meuh a ni.

Ka ke chuan pen a duh a, ka ke tha chuan chu chu hriain kal thei turin hma a lakpui a. Ka pen tauh tauh a. Ka kut chuan ka hnamhrui chu a man bet tlat a. Ka hnam hrui innghahna ka lu chhip ah chuan ka em phurh chuan a rihna neih zawng zawng a pe khawm a, chu chu ka hnungzang chuan hriain a theihtawpin a lo dopui a. Ka ka pawh chuan awl mai tum bik lo in theihtawp chhuahin “heiha…huiha…” a lo ti ve dat dat a. ka thlan tui te lah chuan ka taksa chhung a bibo mai tum lovin mi puih tum niawm fahranin an rawn hnam chhuak a, chu mai duhtawk lo chuan a luanin an rawn luang chhuak zawih zawih a. Ka taksa peng tin mai chu awl bik awm lovin theihtawp an chhuah hlawm a ni

Chho ulh lai ka kal chhoh lai chuan a hahthlak ngei mai. Zawl ka thleng tep a, vengtute’n khawvar an thlir aia nasain ka taksa leh thlarau chuan chu zawl chu a thlir tak meuh meuh a. Chu zawlah chuan chawlhna nuam a awm a ni. Zawl ka thlen chiah chuan ka ding khawmuang a ta a, ka phur ka nghat a. Herhse kung ngheng chuan zo thlifim ka dawng a, ka thlan ka hru dai a, thli chuan min chhem dai sawng sawng a, ka harh sawng sawng mai a. A manhla ngei mai.

Ka kal leh vat loh chuan midang chuan min kalsan thui lutuk ang tih ka hlau bawk sia, chu thlifim chu la thlahlel tak chung chuan hmalam ka pan leh ta a. Kawngsir a hnahah te chuan laiking nipui nilum ai chu a awr tisenin a lo bawk ar ar a, a awhawm ngei mai. Ral leh lamah rengchal leh ngirtling te chuan lenlai chenin khuang an lo chawi bawk a. Chung lam ah chuan vamur leh pengleng te chuan boruak lal ka ni ti niawm takin an leng zuau zuau a. Mute thlifim dawng chu a lo dir char char mai bawk a. Tlaiberh te lah chuan thing chungah infiamin an chiar nak nak hlawm a. Choak rawn thlawk awmchhun chuan muang ban cherh chawrh in ’ak..ak..ak..’ a rawn ti duai duai a. Rapawm zawng a ngaithla duh tan chuan a rapawm thei lek lek ang a ti a ka ngaihtuah lai chuan dai bul kan lo thleng ve der tawh a.

Khaw chhungah chuan tha thar nei ta thut niawm takin pheikhai a zang sawt a, kan kal sawk sawk a. Mahni in kan thleng thuai a. Chhungte chuan ka phur chu min nghahsak a. Ka em phurh an han lakthlak chuah chuan ka zang huai mai a. Ka em a ka phurh maipawl pathum chu ka pa chuan a en vung vung a,”A va tui hmel lem loh ve” a ti ringawt a.