THOMAS CALLAGHAN

Tom –a chu kum 8 mi niin, an class a naupang ber pawl ni mahse class III zirlai zingah chuan a thiam thei ber pawl a ni tlat. Hmanni ah pawh an zirtirtunu Nancy Baines-I’n a nu leh pa te hnenah lehkha thawnin Tom-a chu mi ropui tak a la ni ang tiin a sawi nghe nghe a. A nu Mary Callaghan leh a pa Winston Callaghan te pawn an fapa Thomas Callaghan (Tom-a) chu an chhuang em em a. Naupang fel leh thu awih, naupang tha tak a ni.

Tom-a zing tho chuan coffee a in a, chhangthawp zailep leh thei umkhal a hmeh a. A nu mu theilo lo tho chhuak a hmuh chuan hlim takin a nu bulah chuan, “Nu, vawiin chu nangman min thlah la” a ti a. A nu chuan,”Tehreng mai bawihte, nangmah thlah te chu ka chak lutuk alawm” a ti var a. Tom-a chu hlim takin a room lamah lehkhazir turin a chho ta nghal a. School kal a lo hun chuan a nu chuan a hman leh loh thu leh an nau hruai pangngai, French mi Jaque-a chuan a thlah leh mai tur thu a hrilh chuan Tom-a chu a lunghnur hle a. Nimahsela engmah sawi lemlo chuan School chu a kal ta a.

Tom-a’n an school St. Peters Primary School, North Merseyside, England a naupang primary school tha ber pawl a thlen chuan car atangin lunghnur takin a chhuak a. A thiante ho, an nu leh pa tenen a thlahlel tak a an inthlah lai a hmuh chuan a nu leh pa te ngeiin thlah ve thei se a duh hle a ni. School compound a lut chiah chu a thiante Steven leh Andy te’n an rawn pan a. A lungawilohna zawng zawng theihnghilhin hlim takin an infiam zui nghal a. Nileng a hlim tak a school a kal hnu chuan tlaiah Jacque-a chuan a rawn hruai leh a. In a thlen chuan a nu leh pa te chu dan pangngaiin an lo la haw lova. An eisiam in thingpui a lo lum chu a in khawlh khawlh a. Room lamah a lut chho a, ngawi rengin a inkalhkhum ta a.

Tom-a pa Winston hi One Inch Company ah CEO a ni a. A nu Mary hi Institute of North Fashion-ah Director a ni bawk a. An nupa hian an hna ve ve ah an buai thei em em mai a. Zan rei tak tak thleng an hna ah an tul thin a. Zing lamah pawh Tom-a school kal hma hian an tho hman meuhlo thin a ni. Tom-a pawh hi an kawmhlim hman meuhlo a. Weekend-ah hian a nu leh pa te nen a reilote hun an hman ve theih hi Tom-a hian a thlahlel em em thin a. Kar tluan hian amah awmtu Pi Golstein-i kutah an dah deuh chawt thin a ni. A nu leh pa in enkawl vak hmanlo mahse Pi Golstein-i hian nu leh pa nih a tlinin a enkawl uluk em em a. Hei vang hian Tom-a pawh mipa naupang fel leh zaidam, lehkhathiam tak a nih phah a ni.

Tom-a chu a thiante bul a a awmin hlimin nuam ti hle mahse amah a awm chang hian a rukin a khua a har thin em em mai a. A nu leh pa te bul a awm tlem avangin nu leh pate a ngai thei em em mai a. Ama room-ah ngawi reng a awm keuh keuh nuam a ti tan a. A nun a hlimlo in tuihalna a nei tih Pi Golstein-i chuan a hrechhuak thuai a. A nu leh pa te a hrilh vat a. A nu leh pa te pawh chuan thlasik chawlh ve leh a chawlh hmang a Scotland a Tom-a zinpui turin an intiam a. Tom-a pawh chu a nun a hlim chho leh ta viau a.

Tom-a pa Winston –a Intercom chu a rawn ri a. A secretary chuan Tom-a te zirtirtu nu in a biak duh thu an hrilh a. “Meeting pawimawh kan nei dawn a, a nu lo be mai rawh se” tiin a phone a dah nghal a. Hetihlai hian Institute of North Fashion Director room- a telephone chu a rawn ri tlang tlang a. Mary Callaghan chuan a lo chhang a,

“Hello”

“Mary Callaghan, Tom-a nu i ni em?”

“Aw ni e, enge ni ta?”

“Tom-a te zirtirtu Nancy Baines ka nia…ih…ih…”

Mary chuan a phone ah chuan, ”Aw Lalpa…….” tiin a tapchhuak nghal ta hawm hawm mai a. Chutih lai chuan Winston a te Meeting neihlai chuan a secretary chuan a va bekbawr leh a, “Tom-a a thi” tih a va hrilh ta a ni.

Tom-a chu an school swimming pool-ah break laiin a tla a. A tlak chhan hria leh a tla lai hmu an awm lova. Nasa tak a chhan tum a emergency squad te’n an beih hnu pawhin a tlin talo a ni. Merseyside Cemetary-ah Methodist Pastor Wim Bright-an a vui a. A vui zawh chuan a nu leh pa te chu lungchhe takin an fapa neihchhun in mual a liamsan tak a avangin tap hawm hawm chungin chu favang ni eng mawi tak mai dul ruih hnuai ah chuan inkaihkuahin an ding dun a. Thli a thaw vuk vuk a, Tom-a thlan bul a far thing sang tak bulah chuan an thu dun a. Tom-a an hmuh kir leh theih nan chuan an hna ve ve pawh chan an inhuamin, Tom-a bul a engtiklai pawh a hun hman theih an chak ngawih ngawih a. Mahse a tlai zo ta. Tom-a lukham hnuai atanga an inenkawltu Golstein-i lehkha a hmuh chu an chhiar dun a.

“Ka nu leh pa te u,

Ka dam rei tawh dawn lo tih ka hria, in awihlo maithei. Mahse, hman zan ka mumangah Isuan kan hruai vat dawn che a tia. Naupang tha tak ka ni tir’u? Ih maw, ka nu ka pa ka ngai thei lutuk che u a sin, Pi Golstein-i hian min duat lutuk, mahse ka nu leh pa te ka ngai thin che u asin… School-ah hian ka thiante chu an nu leh pa te’n an thlah thin a, vawikhat tal min thlah ve ula ka ti asin! Office-ah in buai thei lutuk sia, ka tan in thawk thin tih ka hria a. Mahse, ka tan hian nikhat lek pawh chawlh la in ka bulah awm ve ula ka thlahlel che u asin. Nangmahni aia kawm chak ka neilo a, mahse engtiklai mahin ka kawm phakah in awm ngai silo.. Ka ngaih thin zia che u leh ka hmangaih zia che u hi hrilh che u ka chak thin a, ngaithla hmanin in awm silo. Ka khua a har ngawih ngawih thin asin..mangtha u le…

In fapa

Thomas Callaghan”

(I fa chu kawm ngeih rawh. A nun a hloh hmain, I thiantha ber ah siam ang che)